चाळीसगाव लाईव्ह ट्रेंड्स न्यूज प्रतिनिधी | चाळीसगाव तालुक्यात बुधवारी 12 मार्च रोजी संध्याकाळी अचानक दोन वेळा मोठ्या आवाजाने हादरला. या आवाजासोबत जमिनीत कंपनही जाणवल्याने नागरिकांमध्ये घबराटीचे वातावरण निर्माण झाले. अनेकांनी हा भूकंप असल्याचा अंदाज लावून प्रशासनाला माहिती दिली. मात्र, जिल्हा प्रशासनाने भूकंपाचा कोणताही नोंद नसल्याचे स्पष्ट केले आहे.
चाळीसगाव तालुक्यात बुधवारी 12 मार्च रोजी
सायंकाळी सुमारे 5 वाजेच्या सुमारास हा गूढ आवाज शहरासह ग्रामीण भागात ऐकू आला. काही सेकंदाच्या अंतराने दुसऱ्यांदा तोच आवाज पुन्हा ऐकू आला, आणि त्यासोबत हलकासा भूचालसदृश कंपनही जाणवले. यामुळे घबराट उडालेल्या नागरिकांनी तात्काळ घराबाहेर धाव घेतली. काहींनी हा आवाज मोठ्या स्फोटासारखा असल्याचे सांगितले, तर काहींनी तो आकाशात घडलेल्या घटनेशी संबंधित असावा, असा अंदाज व्यक्त केला.
प्रशासनाची तातडीने दखल
घटनास्थळी स्थानिक प्रशासनाने पाहणी केली आणि जिल्हाधिकारी आयुष प्रसाद यांनी या संदर्भात नाशिक येथील मेरी यांच्याशी संपर्क साधला. संस्थेच्या माहितीनुसार, भूकंपाची कोणतीही नोंद झालेली नाही. त्यामुळे हा आवाज आणि जमिनीत जाणवलेले कंपन भूकंपाशी संबंधित नसल्याचे स्पष्ट झाले आहे.
“चाळीसगाव तालुक्यात दोन वेळा मोठा आवाज ऐकू आल्याची माहिती मिळाली होती. नागरिकांनी यामुळे भूकंपाचा अंदाज वर्तवला. मात्र, मेरी संस्थेच्या अहवालानुसार भूकंपाची नोंद नाही. तरीही नागरिकांनी घाबरून जाण्याचे कारण नाही. कोणत्याही अफवांवर विश्वास ठेवू नये,” असे जिल्हाधिकारी आयुष प्रसाद यांनी स्पष्ट केले.
नागरिकांमध्ये भीतीचे वातावरण
या गूढ आवाजाबाबत कोणतीही अधिकृत माहिती नसल्याने नागरिकांमध्ये संभ्रमाचे वातावरण आहे. “अचानक मोठा आवाज झाला आणि काही सेकंदांसाठी जमिनीला कंपन जाणवलं. आम्ही लगेच घराबाहेर पडलो. हा स्फोटासारखा आवाज नक्की कशामुळे झाला, हे समजत नाही,” असे एका स्थानिक नागरिकाने सांगितले.
