मुंबई-लाईव्ह ट्रेंड्स न्यूज वृत्तसेवा। मराठा आरक्षणाच्या मागणीसाठी सुरू असलेल्या मनोज जरांगे पाटील यांच्या उपोषणाला आता आणखी गंभीर वळण मिळाले आहे. सोमवार असूनही मुंबई उच्च न्यायालयाने सुट्टी सोडून तातडीची सुनावणी घेण्याचा निर्णय घेतला आहे. एमी फाउंडेशनने दाखल केलेल्या याचिकेवर न्यायालयात सुनावणी होणार असून संपूर्ण महाराष्ट्राचे लक्ष या निर्णयाकडे लागले आहे.
आझाद मैदानावर सुरू असलेल्या उपोषणाला सोमवारी डॉक्टरांच्या पथकाने भेट देऊन जरांगे पाटील यांच्या प्रकृतीची तपासणी केली. त्यांनी सरकारच्या भूमिकेवर नाराजी दर्शवत पाणी पिणेही बंद करण्याचा निर्णय घेतल्याने त्यांच्या तब्येतीबाबत चिंता वाढली आहे. दरम्यान, मुंबईत आंदोलनाच्या पार्श्वभूमीवर अनेक भागांमध्ये वाहतूक कोंडी निर्माण झाली आहे. सीएसएमटी परिसरात आणि मंत्रालयाजवळ मोठ्या प्रमाणावर आंदोलक जमले असून, रस्त्यांवरील वाहतूक वळवावी लागली आहे.
मनोज जरांगे पाटील यांच्या विरोधात दाखल करण्यात आलेल्या याचिकेवर न्यायालयाने तातडीने सुनावणी घेण्याचा निर्णय घेतला आहे. न्यायमूर्ती गौतम अंखड आणि न्यायमूर्ती रवींद्र घुगे यांच्या खंडपीठासमोर ही सुनावणी होणार आहे. याचिकेत आंदोलनाला बेकायदेशीर ठरवत, सामान्य नागरिकांच्या दैनंदिन जीवनावर होणाऱ्या परिणामांविषयी प्रश्न उपस्थित करण्यात आले आहेत. वकील गुणरत्न सदावर्ते पोलीस संरक्षणात न्यायालयात दाखल झाले असून, कायदेशीर लढाईलाही वेग आला आहे.
सरकारच्या पातळीवरही हालचाली सुरू आहेत. मुख्यमंत्री देवेंद्र फडणवीस यांच्या ‘वर्षा’ निवासस्थानी उच्चस्तरीय बैठक पार पडली. या बैठकीस उपमुख्यमंत्री एकनाथ शिंदे, अजित पवार, राधाकृष्ण विखे पाटील यांच्यासह अन्य मंत्री आणि नेते उपस्थित होते. त्याआधी राधाकृष्ण विखे पाटील यांच्या निवासस्थानी मंत्रिमंडळ उपसमितीची बैठक पार पडली होती. अॅडव्होकेट जनरल बीरेंद्र सराफ यांच्याशी झालेल्या चर्चेत कायदेशीर बाबींचा आढावा घेण्यात आला.
दुसरीकडे, जरांगे पाटील यांनी मराठा अभ्यासकांसह उपोषणस्थळी दीड तास चर्चा केली. आंदोलनात आता अधिक आक्रमक भूमिका घेण्यात येणार असल्याचे संकेत त्यांनी दिले आहेत. हे पाहता सरकारवर दबाव वाढत असून, एकीकडे कायदेशीर बाजू तर दुसरीकडे सामाजिक आंदोलन यामध्ये टोकाचा संघर्ष दिसत आहे.
