मुंबई-लाईव्ह ट्रेंड्स न्यूज वृत्तसेवा । शुक्रवारी मुंबई पोलिसांच्या नियंत्रण कक्षात एका पाठोपाठ एक तीन धमकीचे कॉल्स आल्याने मुंबईच्या छत्रपती शिवाजी महाराज आंतरराष्ट्रीय विमानतळावर खळबळ उडाली. फोन करणाऱ्याने दावा केला की थोड्याच वेळात विमानतळावर मोठा बॉम्बस्फोट होणार आहे. या बातमीने सुरक्षेचा गंभीर प्रश्न निर्माण झाला आणि पोलिस प्रशासन तत्काळ अॅक्शन मोडमध्ये आले.
मुंबई पोलिसांच्या नियंत्रण कक्षाला तीन वेगवेगळ्या क्रमांकांवरून आलेल्या या कॉल्समध्ये विमानतळावर बॉम्ब ठेवण्यात आल्याची आणि तो काही क्षणांतच स्फोट होणार असल्याची माहिती देण्यात आली. या धमकीने पोलिस विभागात खळबळ उडाली आणि तातडीने बॉम्ब शोध पथकासह वरिष्ठ अधिकारी घटनास्थळी दाखल झाले. विमानतळ परिसर रिकामा करण्यात आला आणि संपूर्ण परिसराची बारकाईने, तासंतास तपासणी करण्यात आली.
मुंबई पोलिसांचे उच्च अधिकारी आणि बॉम्ब निकामी पथकांनी टी२ टर्मिनलसह संपूर्ण परिसराचा सर्व कोपऱ्यातून सखोल तपास केला. अनेक तास चाललेल्या या शोधमोहिमेनंतर पोलिसांना कुठेही काहीही संशयास्पद आढळून आले नाही. त्यामुळे या धमकीच्या कॉल्समुळे पसरलेली दहशत अखेरीस फक्त अफवेपर्यंतच मर्यादित राहिली.
प्राथमिक तपासात असे निदर्शनास आले आहे की, हे कॉल्स भारताच्या ईशान्येकडील आसाम आणि पश्चिम बंगालच्या सीमावर्ती भागातील मोबाईल नंबरवरून करण्यात आले होते. यामुळे या कॉल्सचा उद्देश, कॉल करणाऱ्याचे ठिकाण व ओळख पटवण्यासाठी सायबर युनिटची मदत घेऊन तपास सुरु करण्यात आला आहे.
मुंबईच्या आझाद मैदान पोलिसांनी अज्ञात व्यक्तीविरोधात गुन्हा दाखल केला असून, या संपूर्ण प्रकरणाची सखोल चौकशी सुरु आहे. पोलिस अधिकारी आणि तपास पथक धमकी देणाऱ्या व्यक्तीपर्यंत पोहोचण्याचा प्रयत्न करत असून त्याच्या हेतूंवरही प्रकाश टाकण्याचा प्रयत्न चालू आहे. अशा प्रकारच्या अफवांनी नागरिकांमध्ये भीती निर्माण होऊ शकते, त्यामुळे तपास यंत्रणा अधिक सतर्क झाल्या आहेत.
