जळगाव-लाईव्ह ट्रेंडस न्यूज प्रतिनिधी । जळगाव शहरातील हॉटेल नीलांबरी जवळ भरधाव वेगात येणाऱ्या कारने धडक दिल्याने दुचाकीस्वार जखमी झाल्याची घटना मंगळवार ४ जून रोजी सकाळी आठ वाजता घडली होती. या प्रकरणी चौकशी अंती मंगळवारी ११ जून रोजी रात्री ९ वाजता एमआयडीसी पोलिसात कारवरील अज्ञात चालकावर गुन्हा दाखल करण्यात आला.
याबाबत मिळालेली माहिती अशी की, निसार मोहम्मद नियाज अली मोहम्मद वय 43 रा. फातेमा नगर, जळगाव हे आपल्या परिवारासह वास्तव्याला असून मजुरीचे काम करून ते आपला उदरनिर्वाह करत असतात. ४ जून रोजी सकाळी ८ वाजता ते दुचाकीने शहरातील हॉटेल नीलांबरी जवळून एमआयडीसीकडे जात होते. त्यावेळी त्यांना भरधाव कार क्रमांक (एमएच १९ ईजी १८३७) ने त्यांच्या दुचाकीला जोरदार धडक दिली. त्यामुळे ते रोडवर पडले. त्यात त्यांच्या पायाला गंभीर दुखापत झाली. त्यांना खाजगी रुग्णालयात दाखल करण्यात आले. दरम्यान या घटनेबाबत मंगळवारी ११ जून रोजी रात्री ९ वाजता एमआयडीसी पोलीस ठाण्यात कारवरील अज्ञात चालकावर गुन्हा दाखल करण्यात आला आहे. या घटनेचा पुढील तपास पोलीस नाईक गणेश वंजारी हे करीत आहे.
