भुसावळ-लाईव्ह ट्रेंडस न्यूज प्रतिनिधी । भुसावळ नगरपरिषदेच्या सार्वत्रिक निवडणुकीसंदर्भात आज एक मोठी आणि महत्त्वपूर्ण बातमी समोर आली आहे. शहरातील तीन महत्त्वाच्या प्रभागांमधील निवडणूक प्रक्रिया राज्य निवडणूक आयोगाच्या निर्देशानुसार पुढील आदेशापर्यंत पुढे ढकलण्यात आल्या आहेत. यामुळे या विशिष्ट प्रभागांमधील मतदारांची आणि उमेदवारांची प्रतीक्षा आता वाढली आहे.
ज्या प्रभागांची निवडणूक प्रक्रिया स्थगित करण्यात आली आहे, त्यामध्ये प्रभाग क्रमांक ४ ‘ब’, प्रभाग क्रमांक ५ ‘ब’ आणि प्रभाग क्रमांक ११ ‘ब’ या जागांचा समावेश आहे.
या संदर्भातील आदेश निवडणूक निर्णय अधिकारी तथा उपविभागीय अधिकारी जितेंद्र पाटील यांनी आज ३० नोव्हेंबर जारी केले आहेत. निवडणूक आयोगाकडून प्राप्त झालेल्या विशिष्ट निर्देशानुसार ही कार्यवाही करण्यात आल्याचे त्यांनी स्पष्ट केले आहे. निवडणूक प्रक्रिया पुढे ढकलण्यामागचे नेमके कारण अद्याप स्पष्ट झालेले नाही, परंतु हे तांत्रिक अथवा आरक्षणासंबंधीचे कारण असण्याची शक्यता राजकीय वर्तुळात व्यक्त होत आहे.
या निर्णयामुळे भुसावळ नगरपरिषद निवडणुकीतील एकूण उमेदवारी अर्ज आणि प्रचाराच्या रणनीतीवर काही अंशी परिणाम होण्याची शक्यता आहे. उर्वरित प्रभागांमधील निवडणूक प्रक्रिया मात्र नियोजित वेळेनुसार पार पडणार असल्याचे प्रशासनाने स्पष्ट केले आहे.
