मुंबई-लाईव्ह ट्रेंडस न्यूज वृत्तसेवा । महाराष्ट्रातील महानगरपालिका (महापालिका), जिल्हा परिषद (जि.प.) आणि पंचायत समिती (पं.स.) यांसारख्या स्थानिक स्वराज्य संस्थांच्या निवडणुकांसंदर्भात मोठी घोषणा होण्याची शक्यता आहे. गेल्या अनेक महिन्यांपासून प्रलंबित असलेल्या या निवडणुकांच्या तारखांबाबत आज (सोमवार, १५ डिसेंबर) रोजी राज्य निवडणूक आयोगाने महत्त्वाची पत्रकार परिषद आयोजित केली आहे.
सह्याद्री अतिथीगृह येथे पत्रकार परिषद:
राज्य निवडणूक आयोगाने प्रसिद्धीपत्रकाद्वारे दिलेल्या माहितीनुसार, सोमवारी दुपारी ४ वाजता मुंबईतील सह्याद्री अतिथीगृह येथे ही पत्रकार परिषद होणार आहे. या परिषदेत राज्य निवडणूक आयुक्त दिनेश वाघमारे हे स्वतः पत्रकारांशी संवाद साधून स्थानिक स्वराज्य संस्थांच्या निवडणुकीच्या तयारीबाबत आणि संभाव्य वेळापत्रकाबाबत माहिती देणार आहेत. या पत्रकार परिषदेची माहिती राज्य निवडणूक आयोगाचे सहाय्यक आयुक्त डॉ. जगदीश मोरे यांनी प्रसिद्धीपत्रकाद्वारे दिली आहे. आयोगाच्या या अचानक घोषणेमुळे राज्यातील राजकीय हालचालींना वेग आला आहे.
राजकीय पक्षांकडून मोर्चेबांधणीला वेग:
गेल्या अनेक महिन्यांपासून राज्यातील महापालिका निवडणुका कधी होणार याबद्दल राजकीय वर्तुळात जोरदार चर्चा सुरू होती. सर्वच प्रमुख पक्षांनी या पार्श्वभूमीवर आपल्या स्तरावर इच्छुकांच्या मुलाखती घेण्यास सुरुवात केली आहे. शिवसेना (उद्धव बाळासाहेब ठाकरे), भाजप, काँग्रेस आणि राष्ट्रवादी काँग्रेस अशा सर्वच पक्षांनी आपली मोर्चेबांधणी आणि रणनीती निश्चित करण्याचे काम सुरू केले आहे.
निवडणूक आयोगाच्या आजच्या पत्रकार परिषदेकडे संपूर्ण महाराष्ट्राचे लक्ष लागलेले आहे. गेल्या काही वर्षांपासून प्रशासकीय राजवट असलेल्या महापालिकांमध्ये आता लोकनियुक्त प्रतिनिधी कधी येणार, याबद्दल उत्सुकता शिगेला पोहोचली आहे. आजच्या पत्रकार परिषदेत निवडणूक आयुक्त महापालिका, जिल्हा परिषद आणि पंचायत समिती निवडणुकांच्या तारखा किंवा किमान निवडणूक प्रक्रियेच्या टप्प्यांची घोषणा करण्याची दाट शक्यता वर्तवली जात आहे.
