जळगाव-लाईव्ह ट्रेंड्स न्यूज प्रतिनिधी । राज्य शासनाच्या अन्यायकारक कर धोरणांविरोधात आज जळगाव शहरात असंतोषाचे लाट उसळली. वॅट, नूतनीकरण फी व एक्साईज ड्युटीमध्ये झालेल्या वाढीमुळे हतबल झालेल्या बियर बार मालक, वाईन शॉप चालक आणि त्यांच्या कर्मचाऱ्यांनी शिवतीर्थ मैदानापासून जिल्हाधिकारी कार्यालयापर्यंत मूक मोर्चा काढत आपला विरोध व्यक्त केला.
जळगाव जिल्हा रिटेल वाईन असोसिएशन व बियर बार मालक संघटनेच्या संयुक्त नेतृत्वाखाली झालेल्या या मूक आंदोलनात शहरातील सर्व मद्यविक्री दुकाने व बियर बार बंद ठेवण्यात आले होते. अचानक 10 टक्क्यांनी वाढलेला वॅट, 15 टक्क्यांनी वाढलेली नूतनीकरण फी व तब्बल 60 टक्क्यांवर गेलेली एक्साईज ड्युटी यामुळे व्यवसाय डबघाईस आला असल्याचा ठपका संघटनेने ठेवला.
संघटनेचे जिल्हाध्यक्ष ललित पाटील यांच्या मार्गदर्शनाखाली मोर्चाने शांततेच्या मार्गाने जिल्हाधिकारी कार्यालय गाठले. सहभागी नागरिकांनी कोणताही गोंधळ न करता हातात निषेधाचे फलक घेत शासनाच्या धोरणाचा विरोध केला.
जिल्हाधिकारी आयुष प्रसाद यांना संघटनेच्या वतीने निवेदन देण्यात आले. या निवेदनात कर व शुल्कवाढ तातडीने मागे घेण्याची मागणी करण्यात आली आहे. “सरकारच्या या आकसापूर्ण निर्णयामुळे संपूर्ण उद्योग संकटात सापडला असून, अनेक व्यावसायिक दिवाळखोरीच्या उंबरठ्यावर उभे आहेत,” असे या निवेदनात नमूद करण्यात आले.
संघटनेने प्रशासनाला याविरोधात तीव्र आंदोलनाचा इशाराही दिला असून, शासनाने जर लवकरात लवकर हा निर्णय मागे घेतला नाही, तर राज्यभर आंदोलन छेडण्याचा इशाराही देण्यात आला आहे. या मूक मोर्चाला व्यापाऱ्यांसह त्यांच्या कुटुंबीयांचा मोठा पाठिंबा लाभला होता.
मोर्चा पूर्णतः शांततेत पार पडला असून, यानंतरही आंदोलन अधिक तीव्र रूप धारण करणार असल्याची शक्यता संघटनेने व्यक्त केली आहे.
