गोंदिया, वृत्तसंस्था | विधानसभा निवडणुका जाहीर होताच आरोप प्रत्यारोपांचा खेळ पाहायला मिळत असून आमगाव-देवरी विधानसभा मतदार संघातील भाजपचे आमदार संजय पुराम यांचा बारमध्ये एका मुलीसोबत नाचतानाचा एक व्हिडिओ सोशल मीडियावर व्हायरल झाला आहे. व्हिडिओ व्हायरल झाल्याने मतदार संघात एकच खळबळ उडाली आहे.
व्हायरल झालेल्या या व्हिडिओत आमदार संजय पुराम यांच्या सारखा दिसणारा एक व्यक्ती बारमध्ये मुलीचा हात पकडून दारुच्या नशेत तरुणीवर पैसे उडवताना दिसत आहे. या प्रकरणात संजय पुराम यांनी विरोधकांच्या विरोधात प्रतिमा मलिन करण्याचा प्रयत्न केल्याचा गुन्हा दाखल केला आहे. व्हायरल होणाऱ्या व्हिडिओमध्ये फेरफार करण्यात आल्याचेही त्यांनी म्हटले आहे.
हा तर बदनामीचा डाव
विधानसभा निवडणुकीसाठी उमेदवारी अर्ज दाखल करण्याची प्रक्रिया सुरू असतांना संबंधित लोकप्रतिनिधीची लोकप्रियता कमी करण्यासाठी बदनामी करण्याचा विरोधकांचा हा प्रयत्न आहे. यामागील खरे सत्य आणि आरोपी लवकर पुढे येतील, अशी प्रतिक्रिया भाजपचे गोंदियाचे जिल्हाध्यक्ष हेमंत पटले यांनी व्यक्त केली आहे.
