जळगाव-लाईव्ह ट्रेंडस न्यूज प्रतिनिधी । जळगाव तालुक्यातील नशिराबाद गावाजवळील उड्डाणपुलावर मागून भरधाव वेगाने येणाऱ्या अज्ञात वाहनाने दिलेल्या धडकेत दुचाकीस्वाराचा दुदैवी मृत्यू झाल्याची घटना रविवारी ५ ऑक्टोबर रोजी दुपारी दीड वाजेच्या सुमारास घडली आहे. यावेळी नातेवाईकांनी जिल्हा शासकीय वैद्यकीय महाविद्यालयात एकच अक्रोश केला होता. याबाबत नशिराबाद पोलीस ठाण्यात अकस्मात मृत्यूची नोंद करण्यात आली. दिपक कडू सुर्यवंशी वय-४५ रा. नशिराबाद ता.जळगाव असे मयत झालेल्या दुचाकीस्वाराचे नाव आहे.
याबाबत अधिक माहिती अशी की, नशिराबाद गावात दिपक सुर्यवंशी हा तरूण पत्नी व दोन मुलींसह वास्तव्याला होता. नशिराबाद गावातील पार्वती मेडीकलवर काम करून आपला उदरनिर्वाह करत होता. रविवारी ५ ऑक्टोबर रोजी दीपक हा दुचाकीने भुसावळकडून नशिराबाद येथे येत असतांना दुपारी दीड वाजेच्या सुमारास मागुन भरधाव वेगाने येणाऱ्या अज्ञात वाहनाने त्यांच्या दुचाकीला धडक दिली. या अपघातात दिपकच्या डोक्याला गंभीर दुखापत झाल्याने त्याचा जागीच मृत्यू झाला. या घटनेची माहिती मिळाल्यानंतर नातेवाईकांनी जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषीत केले. त्याच्या पश्चात पत्नी जयश्री आणि दोन लहान मुली असा परिवार आहे. याप्रकरणी नशिराबाद पोलीस ठाण्यात अकस्मात मृत्यूची नोंद करण्यात आली.
