मुक्ताईनगर–लाईव्ह ट्रेंड्स न्यूज प्रतिनिधी । तालुक्यात एस.टी. बस चालकावर भररस्त्यात अडवून शिवीगाळ, दमदाटी व मारहाण केल्याची धक्कादायक घटना उघडकीस आली असून, सरकारी कर्तव्य बजावत असताना चालकाला अपमानास्पद वागणूक देण्यात आल्याचा प्रकार समोर आला आहे. या प्रकरणी मुक्ताईनगर पोलीस ठाण्यात संबंधित आरोपींसह चार जणांविरुद्ध गुन्हा दाखल करण्यात आला आहे.
याबाबत जीवन सुभाष सुरवाडे (वय ३५, व्यवसाय – एस.टी. चालक, मुक्ताईनगर आगार) यांनी दिलेल्या फिर्यादीत नमूद केल्यानुसार, ते गेल्या ११ महिन्यांपासून मुक्ताईनगर एस.टी. आगारात चालक म्हणून कार्यरत आहेत. शुक्रवारी, १९ डिसेंबर २०२५ रोजी दुपारी ४ वाजता बस क्रमांक MH-06 S-8631 ने मुक्ताईनगर ते फैजपूर या फेरीसाठी ते वाहक सुषमा रतन बोदडे यांच्यासह रवाना झाले होते.
संध्याकाळी ५.५० वाजता फैजपूरहून परत येताना सावदा, उदळी, चिंचोल, चांगदेव मार्गे प्रवासी घेऊन येत असताना सायंकाळी सुमारे ७.३० वाजता वढवे फाटा ते हरताळा फाटा दरम्यान रस्त्यावर एक पांढऱ्या रंगाची कार उभी होती. त्या कारमधील चालकाने अचानक फ्लॅश लाईट दिल्याने एस.टी. चालकाने बस हळूवारपणे बाजूला घेत कारला मार्ग देण्याचा प्रयत्न केला. मात्र कारमधील चालक खाली उतरून चालकास उद्देशून मोठ्याने आरडाओरड करत गाडी का थांबवली नाही, असा जाब विचारू लागला.
यावेळी कारमधील चालकासोबत असलेल्या अन्य तिघांनीही एस.टी. चालकास शिवीगाळ करत दमदाटी केली. बसमधील वाहक सुषमा बोदडे व प्रवाशांनी मध्यस्थी केल्यानंतर एस.टी. बस पुढे रवाना झाली. त्यानंतर वाहकाने सदर कारचालकाचे नाव अंकुश राजेंद्र चौधरी (रा. चांगदेव, ता. मुक्ताईनगर) असल्याचे चालकास सांगितले.
यानंतर कोथळी गावाजवळील आशादेवी मंदिराजवळ सदर कारने एस.टी. बसचा पाठलाग करून बससमोर आडवी लावण्यात आली. कारमधून उतरून अंकुश चौधरी व त्याच्या तीन साथीदारांनी एस.टी. चालकास शिवीगाळ करत लाथाबुक्क्यांनी व चापटांनी मारहाण केली. इतकेच नव्हे तर “एस.टी. वाले फार माजले आहेत” असे म्हणत चालकास अपमानास्पदपणे त्यांच्या पायाला नाक घासून माफी मागण्यास भाग पाडल्याचा गंभीर आरोप फिर्यादीत करण्यात आला आहे.
वाहक सुषमा बोदडे यांनी हस्तक्षेप करून भांडण सोडवल्यानंतर आरोपी घटनास्थळावरून पसार झाले. त्यानंतर प्रवाशांना सुरक्षितपणे मुक्ताईनगर बसस्थानकावर सोडून एस.टी. चालकाने थेट मुक्ताईनगर पोलीस ठाण्यात धाव घेत तक्रार दाखल केली आहे. सरकारी कर्तव्य बजावत असताना झालेल्या या प्रकारामुळे एस.टी. कर्मचाऱ्यांमध्ये तीव्र संताप व्यक्त होत असून, दोषींवर कठोर कारवाई करण्याची मागणी केली जात आहे.
