जळगाव – लाईव्ह ट्रेंड्स न्यूज प्रतिनिधी । ज्येष्ठ विधिज्ञ अॅड. उज्वल निकम यांची राष्ट्रपतींकडून राज्यसभेवर नामनिर्देशित सदस्य म्हणून नियुक्ती झाल्याने जळगाव शहरात जल्लोषात आनंदोत्सव साजरा करण्यात आला. एक न्यायासाठी लढणारा चेहरा आता संसदेत पोहोचल्याने शहरवासीयांना अभिमान वाटतो आहे. त्यांच्या निवडीची अधिकृत घोषणा होताच शहरात एक वेगळीच उत्साही लाट उसळली.
नियुक्तीच्या बातमीने जळगावमध्ये उत्सवाचे वातावरण निर्माण झाले. निकम कुटुंबीयांनी एकमेकांना पेढे भरवून आनंद साजरा केला. रोहित निकम, शैलेजा निकम आणि रितेश निकम यांनी आपसात मिठाई वाटून, हा ऐतिहासिक क्षण जिवंत केला. यावेळी ढोल-ताशांच्या गजरात स्थानिक नागरिक, समर्थक आणि विविध समाजघटकांनी एकत्र येत जल्लोष साजरा केला. आकाशात फटाक्यांची आतषबाजी झडत असताना, संपूर्ण परिसर “उज्वल निकम यांचा विजय असो” अशा घोषणांनी दुमदुमून गेला.
कार्यक्रमाला आमदार सुरेश भोळे यांच्यासह अनेक प्रतिष्ठित मान्यवर, सामाजिक कार्यकर्ते, स्थानिक लोकप्रतिनिधी आणि नागरिक मोठ्या संख्येने उपस्थित होते. सर्वांनी अॅड. निकम यांना शुभेच्छा देत त्यांच्या कार्याचा गौरव केला. अॅड. उज्वल निकम यांनी आपले संपूर्ण आयुष्य न्यायसंस्थेच्या सेवेत घालवले आहे. त्यांनी मुंबई बॉम्बस्फोट, अजमल कसाब खटला, प्रकाश जाधव प्रकरण यांसारख्या अनेक अतिगंभीर गुन्ह्यांमध्ये सरकारी वकील म्हणून कार्य करत देशाच्या न्यायव्यवस्थेला नवे बळ दिले.
निकम यांच्या राज्यसभा सदस्यत्वाची नियुक्ती ही त्यांच्या दीर्घकालीन कर्तृत्वाची आणि निष्ठेची पावती असल्याचे त्यांच्या कुटुंबीयांचे म्हणणे आहे. लोकसभा निवडणुकीत पराभव पत्करल्यानंतर मिळालेली ही संधी, एक वेगळा आत्मसन्मान घेऊन आली असल्याचा सूर सर्वत्र उमटतो आहे. सामाजिक आणि न्याय क्षेत्रातील योगदानामुळे संपूर्ण महाराष्ट्रात त्यांच्याविषयी आदराचे वातावरण आहे.
या ऐतिहासिक क्षणी जळगाववासीयांनी आपल्या सुपुत्राचा सन्मान साजरा केला. अॅड. निकम यांची नियुक्ती ही केवळ वैयक्तिक यश नसून, ती संपूर्ण जिल्ह्याचा सन्मान असल्याचे नागरिकांनी सांगितले.
