मुक्ताईनगर-लाईव्ह ट्रेंडस न्यूज प्रतिनिधी । मुक्ताईनगर तालुक्यातील लालगोटा गावात भाऊबंदकीच्या वादातून एका ४५ वर्षीय प्रौढ व्यक्तीची हत्या करण्यात आल्याची खळबळजनक घटना रविवार, १७ ऑगस्ट रोजी रात्री ९ वाजता घडली. राणा मनमौजदार पवार (वय-४५) असे खून झालेल्या व्यक्तीचे नाव असून, या हल्ल्यात कुटुंबातील सहा सदस्य जखमी झाले आहेत. या गंभीर प्रकरणात पोलिसांनी १२ आरोपींविरोधात गुन्हा दाखल केला असून, त्यापैकी पाच जणांना तात्काळ अटक करण्यात आली आहे.
पोलिसांनी दिलेल्या माहितीनुसार, लालगोटा येथे देवीची मूर्ती ठेवण्यावरून पवार कुटुंबामध्ये जुना वाद सुरू होता. या वादाने रविवारी रात्री उग्र रूप धारण केले. आरोपींनी राणा पवार यांच्यावर कुऱ्हाड, लोखंडी आसारी, रॉड आणि लाठ्या-काठ्यांनी जीवघेणा हल्ला केला. या हल्ल्यात राणा पवार यांच्या डोक्यात गंभीर दुखापत झाल्याने त्यांचा जागीच मृत्यू झाला.
या हल्ल्यात राणा पवार यांच्या पत्नी मीनाक्षी राणा पवार, तसेच राजकुवर राणा पवार, धनकुमार राणा पवार, सर्जेश सर्जू पवार, सर्जू मनमौजदार पवार आणि चोनीबाई सर्जू पवार (सर्व रा. लालगोटा, ता. मुक्ताईनगर) हे सहा जण जखमी झाले. त्यांना तातडीने उपचारासाठी रुग्णालयात दाखल करण्यात आले आहे.
मृत राणा पवार यांच्या पत्नी मीनाक्षी राणा पवार (वय ४५) यांनी मुक्ताईनगर पोलिसांत फिर्याद दिली आहे. त्यांच्या फिर्यादीनुसार, गुरुदीप जिलीसबाबू पवार, राजेंद्र बाबू सिगरेटबाबू पवार, क्रिश राजेंद्रबाबू पवार, दीपक जिलीसबाबू पवार, जिलीसबाबू कोनानी पवार, शक्ती कपूर सिगरेटबाबू पवार, शिवकपूर शक्तीकपूर पवार, लताबाई शक्तीकपूर पवार, अनुलेखा दीपक पवार आणि अन्य तीन अनोळखी व्यक्तींविरोधात खुनाचा गुन्हा दाखल करण्यात आला आहे.
घटनेचे गांभीर्य लक्षात घेऊन पोलिसांनी तातडीने सूत्रे हलवली. रात्री उशिरापर्यंत केलेल्या कारवाईत पोलिसांनी गुरुदीप जिलीसबाबू पवार, राजेंद्र बाबू सिगरेटबाबू पवार, क्रिश राजेंद्रबाबू पवार, लताबाई शक्तीकपूर पवार आणि अनुलेखा दीपक पवार या पाच आरोपींना अटक केली. या प्रकरणाचा पुढील तपास पोलीस निरीक्षक आशिष अडसुळ करत आहेत.
