जळगाव-लाईव्ह ट्रेंडस न्यूज प्रतिनिधी । जळगाव येथील हरिविठ्ठल नगर येथे राहत्या घरी काहीतरी काम करीत असताना अचानक विजेचा धक्का लागून प्रौढाचा मृत्यू झाल्याची धक्कादायक घटना शुक्रवारी २८ फेब्रुवारी रोजी १० वाजेच्या सुमारास घटना उघडकीला आली आहे. याप्रकरणी रामानंद नगर पोलीस स्टेशनला अकस्मात मृत्यूची नोंद करण्यात आली आहे. शरद शंकर बारी , वय ५०, रा. हरिविठ्ठल नगर, जळगाव) असे मयत इसमाचे नाव आहे.
याबाबत अधिक माहिती अशी की, हरीविठ्ठल नगरात शरद बारी हे आपल्या पत्नी व परिवारासह वास्तव्याला होते. घराजवळ किराणा जनरल स्टोअर्स दुकान चालवून ते परिवाराचा उदरनिर्वाह करीत होते. दरम्यान, शुक्रवारी २८ फेब्रुवारी रोजी सकाळी १० वाजेच्या सुमारास ते घरी असताना काहीतरी काम करीत होते. तेव्हा त्यांना विजेचा जोरदार धक्का बसल्याने ते फेकले गेले. शेजारच्या नागरिकांना कळताच त्यांना शासकीय वैद्यकीय महाविद्यालय व रुग्णालयात उपचारासाठी दाखल केले असता वैद्यकीय अधिकाऱ्यांनी शरद बारी यांना तपासून मयत घोषित केले. यायला कुटुंबीयांनी एकच आक्रोश केला. मनमिळाऊ स्वभावाचे शरद बारी यांच्या मृत्यूमुळे हरिविठ्ठल नगरात शोककळा पसरली आहे. या घटनेप्रकरणी रामानंद नगर पोलीस स्टेशनला अकस्मात मृत्यूची नोंद करण्यात आली आहे. त्यांच्या पश्चात पत्नी, दोन मुली आणि भाऊ असा परिवार आहे.
