मुक्ताईनगर-लाईव्ह ट्रेंड्स न्यूज प्रतिनिधी ।मुक्ताईनगर येथे आदिशक्ती संत मुक्ताई यात्रोत्सवाचा पारंपरिक उत्साहात ध्वजारोहण करून शुभारंभ करण्यात आला. यात्रोत्सवाच्या प्रारंभी मंदिर परिसरात धार्मिक विधी, मंत्रोच्चार आणि भक्तांच्या जयघोषात वातावरण भक्तिमय झाले होते. पंचक्रोशीतील भाविक मोठ्या संख्येने उपस्थित राहिल्याने संपूर्ण परिसरात उत्साहाचे वातावरण पाहायला मिळाले.
यात्रोत्सवाच्या उद्घाटनप्रसंगी तहसीलदार श्री. वखारे प्रमुख उपस्थित होते. तसेच सरपंच अध्यक्ष रवींद्र भैय्या पाटील, आमदार चंद्रकांत पाटील यांचे सुपुत्र हर्षराज पाटील, सरपंच नारायण चौधरी, रवींद्र हरणे महाराज, मंदिराचे विश्वस्त व ग्रामस्थ मोठ्या संख्येने उपस्थित होते. मान्यवरांच्या हस्ते विधीपूर्वक ध्वजारोहण करण्यात आले आणि यात्रोत्सवाची अधिकृत सुरुवात झाली.
ध्वजारोहणानंतर मंदिरात विशेष पूजाअर्चा आणि आरतीचे आयोजन करण्यात आले. संत मुक्ताई यांच्या स्मृतींना अभिवादन करत भाविकांनी दर्शन घेतले. यात्रोत्सवानिमित्त विविध धार्मिक कार्यक्रम, भजन-कीर्तन, प्रवचन आणि सांस्कृतिक उपक्रमांचे आयोजन करण्यात आले असून पुढील काही दिवस भक्तीमय वातावरणात कार्यक्रमांची रेलचेल राहणार आहे.
यात्रोत्सवासाठी मंदिर परिसरात स्वच्छता, पाणीपुरवठा, प्रकाशयोजना आणि सुरक्षेची विशेष व्यवस्था करण्यात आली आहे. ग्रामपंचायत व मंदिर ट्रस्टच्या सहकार्याने भाविकांच्या सोयीसुविधांवर विशेष लक्ष देण्यात आले आहे. स्थानिक प्रशासनानेही वाहतूक व कायदा-सुव्यवस्था राखण्यासाठी आवश्यक उपाययोजना केल्या आहेत.
आदिशक्ती संत मुक्ताई यात्रोत्सव हा मुक्ताईनगरच्या धार्मिक आणि सांस्कृतिक परंपरेचा महत्त्वाचा भाग मानला जातो. दरवर्षी हजारो भाविक या यात्रेत सहभागी होत संत मुक्ताईंच्या दर्शनाचा लाभ घेतात. यंदाही मोठ्या संख्येने भाविक उपस्थित राहतील, असा विश्वास आयोजकांनी व्यक्त केला आहे.
