कल्याण-लाईव्ह ट्रेंडस न्यूज वृत्तसेवा । कल्याणहून दादरला जाणाऱ्या लोकलमध्ये एका तरुणाने तीन प्रवाशांवर चाकू हल्ला केल्याने खळबळ उडाली आहे. शेख जिया हुसेन असे हल्ला करणाऱ्या तरुणाचे नाव आहे.
ट्रेन कल्याणहून दादरला निघाली होती. कामावर जाण्याची घाई असल्याने ट्रेनमध्ये मोठी गर्दी होती. शेख जिया हुसेन याला मुंब्रा येथे उतरायचे होते, परंतु गर्दीमुळे त्याला उतरता आले नाही. जेव्हा त्याला समजले की ही फास्ट ट्रेन मुंब्रा येथे थांबणार नाही, तेव्हा त्याने प्रवाशांना धक्का मारून दरवाजाच्या दिशेने जाण्याचा प्रयत्न करत होता. याच दरम्यान प्रवाशांशी त्याचा वाद झाला. वादानंतर त्याने खिशातील चाकू काढून तीन प्रवाशांवर हल्ला केला. या हल्ल्यात प्रवासी जखमी झाले आहेत. डोंबिवली रेल्वे पोलिसांनी हल्लेखोर तरुण शेख जिया हुसेन (वय १९) याला अटक केली असून, घटनेचा अधिक तपास सुरू आहे.
या घटनेमुळे लोकलमधील प्रवासाच्या सुरक्षेचा प्रश्न पुन्हा एकदा ऐरणीवर आला आहे. यापूर्वीही अशा घटना घडल्या आहेत, ज्यात नशेत असलेल्या व्यक्तींकडून प्रवाशांना त्रास देण्यात आला आहे. आता प्रवाशांवर चाकू हल्ला झाल्याने प्रवाशांमध्ये भीतीचे वातावरण निर्माण झाले आहे.
