मुक्ताईनगर-लाईव्ह ट्रेंड्स न्यूज प्रतिनिधी । राज्यातील अनेक भागांमध्ये झालेल्या मुसळधार पावसामुळे शेतकऱ्यांना भीषण संकटांचा सामना करावा लागत आहे. अतिवृष्टीमुळे निर्माण झालेल्या पूरस्थितीत शेतीचे प्रचंड नुकसान झाले असून, अनेक कुटुंबे आर्थिक संकटात सापडली आहेत. या पार्श्वभूमीवर मुक्ताईनगर येथील उपजिल्हा रुग्णालयातील कर्मचाऱ्यांनी शेतकऱ्यांच्या मदतीसाठी सामाजिक जबाबदारी जपत एक महत्त्वपूर्ण पाऊल उचलले आहे.
उपजिल्हा रुग्णालयात कार्यरत असलेले कर्मचारी श्री. प्रदीप काळे यांनी आपल्या मासिक वेतनातील एक दिवसाचे वेतन मुख्यमंत्री सहाय्यता निधीसाठी दिले आहे. त्यांनी यासाठीचा धनादेश मुक्ताईनगरचे तहसीलदार यांच्याकडे औपचारिकरित्या सुपूर्द केला. श्री. काळे यांच्या या स्तुत्य उपक्रमाचे परिसरात सर्वत्र कौतुक होत आहे. पूरग्रस्तांच्या मदतीसाठी त्यांनी दाखवलेली संवेदनशीलता आणि सामाजिक बांधिलकी अनेकांसाठी प्रेरणादायी ठरत आहे.
या वेळी त्यांच्या सोबत रुग्णालयातीलच कर्मचारी अनिल सुरवाडे, दिलीप खेवलकर, कृष्णल पाटील हे देखील उपस्थित होते. श्री. काळे यांनी केवळ स्वतः पुढाकार घेत थांबले नाही, तर इतर शासकीय आणि खासगी नोकरदारांनाही पुढे येण्याचे आणि पूरग्रस्तांना शक्य ती मदत करण्याचे आवाहन केले. अशा प्रसंगी समाजाने एकत्र येऊन गरजूंना आधार देण्याची गरज आहे, हे त्यांनी आपल्या कृतीतून दाखवून दिले आहे.
राज्यभरातून मदतीचे हात पुढे येत असतानाच, मुक्ताईनगरच्या या सरकारी कर्मचाऱ्याचा साधा पण मोलाचा उपक्रम समाजात सकारात्मक संदेश देणारा आहे. संकटाच्या काळात केवळ योजना आणि आश्वासने नव्हे, तर प्रत्यक्ष कृतीतूनही मदत पोहोचवता येते, हे श्री. काळे यांनी सिद्ध केले आहे.
