जळगाव-लाईव्ह ट्रेंडस न्यूज प्रतिनिधी । जळगाव शहरातील चित्रा चौकात अज्ञात वाहनाने दिलेल्या धडकेत दुचाकीस्वार गंभीर जखमी झाल्याची घटना बुधवारी १ जानेवारी रोजी रात्री ११.३० वाजता घडली आहे. याप्रकरणी गुरूवारी २ जानेवारी रोजी पहाटे साडेतीन वाजता जळगाव शहर पोलीस ठाण्यात गुन्हा दाखल करण्यात आला आहे.
याबाबत अधिक माहिती अशी की, जळगाव शहरातील हरविठ्ठल नगरात मौसिन सलिम पिंजारी वय २३ हा तरूण बुधवारी १ जानेवारी रोजी रात्री ११.३० वाजता दुचाकी क्रमांक (एमएच १९ डीआर ७७१६) ने नेरी नाक्याकडून टॉवर चौककडे येत असतांना चित्रा चौकात समोरून भरधाव वेगाने येणाऱ्या अज्ञात चारचाकी वाहनाने जोरदार धडक दिली. या धडकेत मौसिन पिंजारी हे गंभीर जखमी झाले. त्यांना खासगी वाहनाने रूग्णालयात उपचारार्थ दाखल करण्यात आले. याप्रकरणी गुरूवारी २ जानेवारी रोजी पहाटे साडेतीन वाजता जळगाव शहर पोलीस ठाण्यात फिर्याद दिली. त्यानुसार अज्ञात चारचाकी वाहन चालकावर गुन्हा दाखल करण्यात आला. पुढील तपास पोहेकॉ बालाजी बारी हे करीत आहे.
