मुक्ताईनगर लाईव्ह ट्रेंडस न्यूज प्रतिनिधी । मलकापूरकडून मुक्ताईनगरकडे जाणाऱ्या महामार्गावर पिंपरी अकाराऊत शिवारात एक भीषण अपघात घडला आहे. भरधाव वेगातील पल्सर दुचाकी अनियंत्रित होऊन दुभाजकावर जोरात आदळल्याने तीन तरुण गंभीर जखमी झाले आहेत.
मिळालेल्या माहितीनुसार, रविवारी १८ जानेवारी रोजी दुपारी एक पल्सर दुचाकी (क्र. एमएच ५४, १४०६) मलकापूरकडून मुक्ताईनगरच्या दिशेने सुसाट वेगात जात होती. पिंपरी अकाराऊत गावाजवळ असलेल्या रस्त्यावर चालकाचे दुचाकीवरील नियंत्रण सुटले आणि गाडी थेट रस्ते दुभाजकावर जाऊन आदळली. अपघात घडल्यानंतर परिसरात मोठी खळबळ उडाली. यावेळी रस्त्यावरून जाणाऱ्या काही स्थानिक तरुणांनी आणि प्रवाशांनी माणुसकी दाखवत तातडीने मदतीसाठी धाव घेतली. रक्ताच्या थारोळ्यात पडलेल्या तिन्ही जखमींना तरुणांनी उचलून रस्त्याच्या कडेला घेतले आणि त्यांच्यावर प्राथमिक उपचार करण्याचा प्रयत्न केला.
अपघातातील तिन्ही तरुणांना डोक्याला आणि पायाला गंभीर दुखापत झाली असून मोठ्या प्रमाणावर रक्तस्राव झाला आहे. घटनेची माहिती मिळताच पोलिसांनी रुग्णवाहिकेला पाचारण केले. जखमींना उपचारासाठी जवळच्या उपजिल्हा रुग्णालयात हलवण्यात आले असून, त्यांची ओळख पटवण्याचे काम पोलीस करत आहेत.
