जळगाव-लाईव्ह ट्रेंडस न्यूज प्रतिनिधी । जळगाव शहरातील एस.के. ऑइल मिल समोरील रस्त्यावर आपल्या कामाचे थकलेले पैसे मागण्यासाठी गेलेल्या एका ५० वर्षीय प्रौढाला आरोपीने शिवीगाळ करत लोखंडी वस्तूने मारहाण केली. इतकेच नाही तर, त्याला जीवेठार मारण्याची धमकी देखील देण्यात आली. २६ सप्टेंबर रोजी पहाटे ६ वाजेच्या सुमारास ही धक्कादायक घटना घडली असून, या संदर्भात रात्री उशिरा जळगाव शहर पोलीस ठाण्यात आरोपीविरुद्ध गुन्हा दाखल करण्यात आला आहे.
नेमकी काय आहे ही घटना ?
माणिक सुरेश भोसले (वय ५०, रा. राधाकृष्ण नगर, जळगाव) हे आपल्या कुटुंबासह वास्तव्यास आहेत. ते मजुरी करून आपला उदरनिर्वाह चालवतात. शुक्रवारी (२६ सप्टेंबर) रोजी सकाळी ६ वाजताच्या सुमारास माणिक भोसले हे एस.के. ऑइल मिल परिसरातील शिवराम सुकलाल सपकाळे (वय ५०, रा. दूध फेडरेशन, जळगाव) याच्याकडे त्यांच्या कामाचे थकीत पैसे मागण्यासाठी गेले होते.
पैसे मागितल्याने शिवराम सपकाळे याला अत्यंत राग आला. त्याने त्वरित माणिक भोसले यांना शिवीगाळ करण्यास सुरुवात केली. वादाचे रूपांतर हाणामारीत झाले आणि आरोपी शिवराम सपकाळे याने रागाच्या भरात तेथे असलेल्या लोखंडी वस्तूने माणिक भोसले यांच्यावर हल्ला केला. या हल्ल्यात भोसले यांच्या डोक्याला आणि हाताला गंभीर दुखापत झाली. जखमी अवस्थेतही शिवराम सपकाळे याने त्यांना जीवे ठार मारण्याची धमकी दिली.
या घटनेनंतर गंभीर जखमी झालेल्या माणिक भोसले यांनी जळगाव शहर पोलीस ठाणे गाठून घडलेल्या प्रकाराची माहिती दिली व फिर्याद दाखल केली. पीडित प्रौढाच्या तक्रारीवरून पोलिसांनी तात्काळ कारवाई केली. शुक्रवारी रात्री ११ वाजता आरोपी शिवराम सुकलाल सपकाळे (वय ५०) याच्या विरोधात जळगाव शहर पोलीस ठाण्यात मारहाण करणे, गंभीर दुखापत करणे आणि जीवे ठार मारण्याची धमकी देणे अशा विविध कलमांखाली गुन्हा दाखल करण्यात आला आहे. या घटनेचा पुढील तपास पोलीस कॉन्स्टेबल प्रफुल्ल धांडे हे करीत आहेत.
