Home प्रशासन तहसील बोदवड तालुक्यातील २०,०२३ दुष्काळग्रस्त शेतकऱ्यांच्या खात्यात ५ हजारांची मदत जमा ; उर्वरित...

बोदवड तालुक्यातील २०,०२३ दुष्काळग्रस्त शेतकऱ्यांच्या खात्यात ५ हजारांची मदत जमा ; उर्वरित शेतकऱ्यांनाही दिलासा देण्याचे तहसीलदारांचे आश्वासन

0
8

बोदवड-लाईव्ह ट्रेंड्स न्यूज प्रतिनिधी । शासनाकडून दुष्काळग्रस्त शेतकऱ्यांसाठी जाहीर करण्यात आलेल्या प्रत्येकी ५ हजार रुपयांच्या अग्रिम आर्थिक मदतीपैकी बोदवड तालुक्यातील आतापर्यंत २० हजार २३ शेतकऱ्यांच्या बँक खात्यांत रक्कम जमा झाली आहे. मात्र, आवश्यक प्रक्रिया पूर्ण करूनही काही पात्र शेतकरी अद्याप मदतीपासून वंचित आहेत. अशा शेतकऱ्यांना तातडीने आर्थिक मदत मिळावी, या मागणीसाठी युवासेना तालुकाप्रमुख अजय पाटील यांच्यासह शिवसैनिकांनी तहसीलदार ज्ञानेश्वर सपकाळे यांची भेट घेऊन निवेदन दिले. यावेळी उर्वरित पात्र शेतकऱ्यांच्या प्रकरणांची तपासणी करून आवश्यक कार्यवाही करण्याचे आश्वासन तहसीलदारांनी दिले.

शेतकऱ्यांना दुष्काळी परिस्थितीत आर्थिक आधार मिळावा, यासाठी शासनाने अग्रिम मदतीची घोषणा केली आहे. त्यानुसार बोदवड तालुक्यातील २० हजार २३ शेतकऱ्यांच्या खात्यांत प्रत्येकी ५ हजार रुपयांची मदत जमा झाल्याची माहिती तहसीलदार ज्ञानेश्वर सपकाळे यांनी निवेदनकर्त्यांना दिली. मात्र, तालुक्यातील काही पात्र शेतकऱ्यांच्या खात्यांत अद्याप मदतीची रक्कम जमा झालेली नसल्याने त्यांच्यात नाराजी आहे. या शेतकऱ्यांना मदत मिळण्यासाठी प्रशासनाने प्रलंबित प्रकरणांचा तातडीने निपटारा करावा, अशी मागणी यावेळी करण्यात आली.

तहसीलदार सपकाळे यांनी स्पष्ट केले की, सातबारा उताऱ्यावर सामाईक नावे असलेल्या शेतकऱ्यांनी आवश्यक संमतीपत्र सादर करणे गरजेचे आहे. संमतीपत्राची प्रक्रिया पूर्ण न झाल्यास मदत मिळण्यास अडचणी येऊ शकतात. त्यामुळे संबंधित शेतकऱ्यांनी आवश्यक कागदपत्रांची पूर्तता करून प्रशासनाकडे संमतीपत्र सादर करावे, असे आवाहन त्यांनी केले. याशिवाय बोदवड तालुक्यातील तब्बल ९८ टक्के शेतकऱ्यांचे फार्मर आयडी तयार झाले असल्याची माहितीही तहसीलदारांनी दिली. उर्वरित शेतकऱ्यांनी येत्या सात ते आठ दिवसांत आपले फार्मर आयडी तयार करून घ्यावेत, असे आवाहन करण्यात आले. शासनाच्या विविध योजनांचा लाभ मिळविण्यासाठी फार्मर आयडीची आवश्यकता असल्याने शेतकऱ्यांनी ही प्रक्रिया वेळेत पूर्ण करणे महत्त्वाचे आहे.

ज्या शेतकऱ्यांनी ई-केवायसी, फार्मर आयडी, ई-पीक पाहणी नोंदणी तसेच आवश्यक कागदपत्रांची पूर्तता केली आहे, मात्र तरीही त्यांच्या बँक खात्यात मदतीची रक्कम जमा झालेली नाही, अशा प्रकरणांची योग्य तपासणी केली जाईल. संबंधित त्रुटींची पडताळणी करून नियमानुसार आवश्यक कार्यवाही करण्यात येईल, असे आश्वासन तहसीलदार ज्ञानेश्वर सपकाळे यांनी निवेदनकर्त्यांना दिले. युवासेना तालुकाप्रमुख अजय पाटील, शिवसैनिक अमोल व्यवहारे, योगेश पाटील आणि केशव देशमुख यांनी प्रशासनाकडे ही मागणी मांडली. पात्र असूनही मदतीपासून वंचित राहिलेल्या शेतकऱ्यांना केवळ तांत्रिक अडचणींमुळे प्रतीक्षा करावी लागू नये. प्रशासनाने अशा प्रकरणांची तातडीने छाननी करून पात्र शेतकऱ्यांच्या खात्यांत मदत जमा करण्यासाठी कार्यवाही करावी, अशी भूमिका त्यांनी मांडली.


Protected Content

Play sound