यावल-लाईव्ह ट्रेंड्स न्यूज प्रतिनिधी । यावल नगरपालिकेच्या थेट जनतेतून निवडून आलेल्या लोकनियुक्त नगराध्यक्षा छाया अतुल पाटील यांना मुंबई उच्च न्यायालयाच्या औरंगाबाद खंडपीठाने अत्यंत महत्त्वपूर्ण अंतरिम दिलासा दिला आहे. नगरपालिकेच्या आर्थिक व्यवहारांशी संबंधित नमुना क्रमांक ६४ वरील देयकांच्या व्हाउचरवर नगराध्यक्षांची स्वाक्षरी असणे तसेच सर्व धनादेशांवर नगराध्यक्ष व मुख्याधिकारी यांच्या संयुक्त स्वाक्षऱ्या असण्याबाबत न्यायालयाने महत्त्वपूर्ण अंतरिम आदेश जारी केले आहेत.
मुंबई उच्च न्यायालयाच्या औरंगाबाद खंडपीठातील न्यायमूर्ती नितीन बी. सूर्यवंशी आणि न्यायमूर्ती आबासाहेब डी. शिंदे यांच्या खंडपीठासमोर ४ नोव्हेंबर २०२६ रोजी या प्रकरणी महत्त्वपूर्ण सुनावणी पार पडली. सुनावणीदरम्यान न्यायालयाने प्रतिवादी असलेल्या महाराष्ट्र सरकारला रीतसर नोटीस बजावण्याचे निर्देश दिले असून याचिकेत करण्यात आलेल्या मागणीच्या अनुषंगाने याचिकाकर्त्यांना अंतरिम दिलासा मंजूर केला आहे. या आदेशामुळे नगरपालिकेच्या प्रशासकीय आणि वित्तीय कारभारात लोकनियुक्त नगराध्यक्षांचे स्थान पुन्हा एकदा भक्कम झाले आहे.
या प्रकरणात याचिकाकर्ती नगराध्यक्षा यांच्या वतीने उच्च न्यायालयात बाजू मांडताना ॲड. मीनल देशमुख यांनी लोकनियुक्त नगराध्यक्षांचे संवैधानिक अधिकार, स्थानिक स्वराज्य संस्थेतील त्यांचे अनन्यसाधारण महत्त्व आणि नगरपरिषदेच्या प्रशासकीय व आर्थिक निर्णयप्रक्रियेतील त्यांची कायदेशीर भूमिका न्यायालयाच्या निदर्शनास आणून दिली. थेट जनतेतून निवडून आलेल्या नगराध्यक्षांना नगरपरिषदेच्या आर्थिक व्यवहारांपासून दूर ठेवता येणार नाही, तसेच लोकप्रतिनिधी म्हणून त्यांचा निर्णय प्रक्रियेतील सहभाग अत्यंत महत्त्वाचा आहे, हा मुद्दा ॲड. देशमुख यांनी न्यायालयासमोर प्रभावीपणे अधोरेखित केला.
उच्च न्यायालयाच्या या अंतरिम आदेशानुसार नमुना क्रमांक ६४ अन्वये सर्व देयकांच्या व्हाउचरवर याचिकाकर्ती नगराध्यक्ष यांची स्वाक्षरी असणे अनिवार्य राहणार आहे. त्याचप्रमाणे नगरपालिकेचे सर्व धनादेश नगराध्यक्ष व नगरपरिषदेचे मुख्याधिकारी यांच्या संयुक्त स्वाक्षरीनेच जारी करण्याची अंतरिम व्यवस्था लागू राहील. औरंगाबाद खंडपीठाने दिलेल्या या निर्णयामुळे यावल नगरपालिकेच्या आर्थिक व्यवहारांमध्ये लोकनियुक्त नगराध्यक्षांच्या स्वाक्षरीचे स्थान निश्चित झाले असून प्रशासकीय व आर्थिक कारभारातील त्यांच्या सहभागाला मोठे महत्त्व प्राप्त झाले आहे.
