वरणगाव, ता. भुसावळ-दत्तात्रय गुरव । भुसावळ तालुक्यातील सुसरी शिवारात कांदा पिकाला पाणी देण्यासाठी गेलेल्या शेतकरी दाम्पत्याचा विजेचा धक्का लागून दुर्दैवी मृत्यू झाल्याची हृदयद्रावक घटना आज दुपारी घडली. शेतात वन्यप्राण्यांना रोखण्यासाठी लावलेल्या झटका उपकरणाच्या तारांमध्ये विद्युत प्रवाह उतरल्याने हा अपघात झाल्याची प्राथमिक माहिती आहे. या घटनेमुळे सुसरी गावासह परिसरात शोककळा पसरली असून सर्वत्र हळहळ व्यक्त होत आहे.
या दुर्दैवी घटनेत अशोक बाबूराव पाटील (वय ५६) आणि त्यांची पत्नी सरिता अशोक पाटील (वय ४८), रा. सुसरी, ता. भुसावळ, यांचा मृत्यू झाला आहे. पाटील दाम्पत्य नेहमीप्रमाणे आपल्या शेतातील कांदा पिकाला पाणी देण्यासाठी गेले होते. मात्र, शेतात गेलेल्या या दाम्पत्यावर काळाने घाला घातल्याने कुटुंबावर दुःखाचा डोंगर कोसळला आहे. मिळालेल्या माहितीनुसार, अशोक पाटील हे आपल्या कुटुंबासह सुसरी येथे वास्तव्यास होते. शेती हा त्यांच्या उदरनिर्वाहाचा प्रमुख आधार होता. आज दुपारी ते पत्नी सरिता यांच्यासह सुसरी शिवारातील स्वतःच्या शेतात कांदा पिकाला पाणी देण्यासाठी गेले होते. शेतात वन्यप्राण्यांचा उपद्रव रोखण्यासाठी त्यांनी झटका उपकरण लावले होते. या उपकरणाच्या तारांमध्ये विद्युत प्रवाह उतरल्याने त्याच्या संपर्कात आलेल्या पाटील दाम्पत्याला विजेचा जोरदार धक्का बसला.
विजेचा धक्का इतका तीव्र होता की, दोघांचाही जागीच मृत्यू झाल्याची माहिती समोर आली आहे. शेतात गेलेले दाम्पत्य बराच वेळ परत न आल्याने किंवा घटनेची माहिती मिळाल्यानंतर परिसरातील ग्रामस्थांनी घटनास्थळी धाव घेतली. त्यानंतर दोघांनाही तातडीने वरणगाव येथील शासकीय रुग्णालयात दाखल करण्यात आले. मात्र, तेथील वैद्यकीय अधिकाऱ्यांनी तपासणी करून त्यांना मृत घोषित केले. शेतीच्या कामासाठी शेतात गेलेल्या पती-पत्नीचा एकाच वेळी मृत्यू झाल्याने पाटील कुटुंबावर दुःखाचा डोंगर कोसळला आहे. या घटनेने सुसरी गावासह आसपासच्या परिसरात शोककळा पसरली असून ग्रामस्थांकडून हळहळ व्यक्त केली जात आहे.
