जळगाव-लाईव्ह ट्रेंड्स न्यूज प्रतिनिधी । प्राध्यापकांच्या अध्यापन, संशोधन क्षमता आणि व्यावसायिक कौशल्यांना अधिक व्यापक स्वरूप देण्याच्या उद्देशाने गोदावरी फाउंडेशन संचलित गोदावरी इन्स्टिट्यूट ऑफ मॅनेजमेंट अँड रिसर्च (जीआयएमआर), जळगाव येथे विशेष ‘फॅकल्टी डेव्हलपमेंट प्रोग्राम’ (एफडीपी) आयोजित करण्यात आला. या मार्गदर्शन सत्रात वाणिज्य व व्यवस्थापनशास्त्रातील ज्येष्ठ अभ्यासक, संशोधक तथा रिसर्च गाईड डॉ. दिलीप संतोष चव्हाण यांनी प्राध्यापक व संशोधकांना संशोधनासोबतच शैक्षणिक आणि व्यावसायिक मूल्यांचे महत्त्व पटवून दिले.
कार्यक्रमाच्या प्रारंभी संस्थेचे संचालक डॉ. प्रशांत वारके यांच्या हस्ते डॉ. दिलीप चव्हाण यांचा सत्कार करण्यात आला. डॉ. चव्हाण यांना अध्यापन क्षेत्रातील २० वर्षांहून अधिक अनुभव असून, त्यांच्या नावावर ७४ हून अधिक शोधनिबंध प्रकाशित झाले आहेत. विविध विषयांवर त्यांनी पुस्तकलेखनही केले आहे. त्यांच्या अनुभवातून मिळणारे मार्गदर्शन प्राध्यापक आणि संशोधकांसाठी उपयुक्त ठरल्याचे यावेळी नमूद करण्यात आले.
मार्गदर्शनपर सत्रात डॉ. चव्हाण यांनी नीतिमत्ता, पारदर्शकता, कमिटमेंट आणि संघभावना या मूल्यांना शैक्षणिक तसेच व्यावसायिक जीवनात असलेले महत्त्व स्पष्ट केले. प्राध्यापकाची भूमिका केवळ वर्गखोलीत अध्यापन करण्यापुरती मर्यादित नसून विद्यार्थ्यांमध्ये योग्य मूल्यांची रुजवणूक करण्याचीही जबाबदारी शिक्षकांवर असते, असे त्यांनी सांगितले.
विद्यार्थ्यांशी संवाद साधताना आदरयुक्त आणि सकारात्मक दृष्टिकोन ठेवण्याची गरज त्यांनी अधोरेखित केली. शैक्षणिक क्षेत्रात ज्ञान आणि कौशल्याबरोबरच नैतिक मूल्ये, पारदर्शकता आणि व्यावसायिक बांधिलकी जपणे आवश्यक असल्याचे त्यांनी स्पष्ट केले. बदलत्या शैक्षणिक वातावरणात शिक्षकांनी स्वतःच्या व्यावसायिक कौशल्यांचा सातत्याने विकास करणे गरजेचे असल्याचेही त्यांनी सांगितले.
संशोधन क्षेत्रातील विविध पैलूंवरही डॉ. चव्हाण यांनी सविस्तर मार्गदर्शन केले. दर्जेदार शोधनिबंध लेखन करताना संशोधनाचा विषय, त्याची व्याप्ती, संशोधन पद्धती आणि निष्कर्षांची मांडणी याकडे गांभीर्याने पाहण्याची आवश्यकता त्यांनी स्पष्ट केली. संशोधनाची गुणवत्ता वाढविण्यासोबतच संशोधनाचे प्रभावी पेपर प्रेझेंटेशन करण्याचे कौशल्य विकसित करणेही महत्त्वाचे असल्याचे त्यांनी सांगितले.
आंतरराष्ट्रीय व्यासपीठावर संशोधन मांडताना संशोधकांनी विषयाची योग्य निवड, प्रभावी मांडणी, सादरीकरण कौशल्य आणि संशोधनाची गुणवत्ता या बाबींवर विशेष लक्ष केंद्रित करावे, असे डॉ. चव्हाण यांनी स्पष्ट केले. तुर्की येथे झालेल्या ऑनलाइन संशोधन सादरीकरणाचा संदर्भ देत त्यांनी आंतरराष्ट्रीय स्तरावरील संशोधन सादरीकरणाची प्रक्रिया आणि त्यातील आवश्यक बाबींवर उपस्थितांना मार्गदर्शन केले.
या सत्रामुळे प्राध्यापक आणि संशोधकांना संशोधनाची गुणवत्ता वाढविण्यासोबतच आंतरराष्ट्रीय स्तरावर संशोधन प्रभावीपणे सादर करण्याच्या दृष्टीने विविध उपयुक्त बाबी समजून घेता आल्या. अध्यापनातील व्यावसायिकता आणि नैतिक मूल्यांची सांगड घालण्याबाबतही या कार्यक्रमातून मार्गदर्शन मिळाले.
गोदावरी आयएमआरच्या या फॅकल्टी डेव्हलपमेंट प्रोग्राममध्ये प्राध्यापक, संशोधक आणि संबंधित शैक्षणिक घटक मोठ्या संख्येने सहभागी झाले. संशोधनाची गुणवत्ता, प्रभावी सादरीकरण आणि व्यावसायिक मूल्ये या तिन्ही बाबींना एकत्रित महत्त्व देणारे हे मार्गदर्शन सत्र शैक्षणिक क्षेत्रातील कौशल्यविकासासाठी उपयुक्त ठरले.
