फैजपूर-लाईव्ह ट्रेंड्स न्यूज प्रतिनिधी । यावल तालुक्यातील कासवा गावाच्या शिवारातील तापी नदीपात्रात अवैधरित्या गावठी हातभट्टीची दारू तयार केली जात असल्याची माहिती मिळताच फैजपूर पोलिसांनी बुधवारी (१९ ऑगस्ट) सकाळी धडक कारवाई केली. पोलिसांनी संबंधित ठिकाणी छापा टाकून सुमारे ९,५०० रुपये किमतीचे दारू निर्मितीसाठी वापरले जाणारे रसायन, तयार गावठी दारू आणि निर्मितीची साधने नष्ट केली. या प्रकरणी एका संशयिताविरुद्ध महाराष्ट्र दारूबंदी अधिनियमांतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, कासवा, ता. यावल येथील रहिवासी संजय मोहन सपकाळे हा तापी नदीपात्रात अवैधरित्या गावठी हातभट्टीची दारू तयार करीत असल्याची माहिती फैजपूर पोलिसांना मिळाली होती. या माहितीच्या आधारे पोलिसांच्या पथकाने बुधवारी सकाळी सुमारे ८.३० वाजता संबंधित ठिकाणी छापा टाकला. छाप्यादरम्यान दारू निर्मितीसाठी मोठ्या प्रमाणावर वापरण्यात येणारे गुळ-मोह-नवसागर मिश्रित कच्चे व पक्के रसायन आढळून आले. पोलिसांनी पंचनामा करून सुमारे २०० लिटर रसायन, १० लिटर तयार गावठी हातभट्टीची दारू तसेच दारू निर्मितीसाठी वापरण्यात येणारी साधने असा एकूण सुमारे ९,५०० रुपयांचा मुद्देमाल नष्ट केला.
या कारवाईमुळे तापी नदीपात्रात सुरू असलेल्या कथित अवैध दारू निर्मितीच्या व्यवसायाला मोठा धक्का बसला आहे. नदीपात्रासारख्या निर्जन भागाचा वापर करून हातभट्टी चालवली जात असल्याने अशा ठिकाणी पोलिसांकडून अधिक प्रभावी गस्त आणि नियमित तपासणीची गरज असल्याची चर्चा परिसरात सुरू आहे. या प्रकरणी पोलीस कॉन्स्टेबल विजय चत्तरालाल परदेशी यांनी दिलेल्या फिर्यादीवरून फैजपूर पोलीस ठाण्यात १९ ऑगस्ट रोजी गुन्हा दाखल करण्यात आला आहे. फैजपूर उपविभागाचे उपविभागीय पोलीस अधिकारी अनिल बडगुजर यांच्या मार्गदर्शनाखाली सहायक पोलीस निरीक्षक संदीप पाटील, ग्रेड पोलीस उपनिरीक्षक संतोष चौधरी, सहायक फौजदार मोती पवार, पोहेकॉ. विकास सोनवणे आणि पोलीस कॉन्स्टेबल विजय परदेशी यांच्या पथकाने ही कारवाई केली.
फैजपूर पोलिसांकडून अवैध गावठी दारू निर्मिती व विक्रीविरोधात सातत्याने कारवाई केली जात आहे. ग्रामीण आणि नदीपात्रातील निर्जन भागात सुरू असलेल्या अशा अवैध धंद्यांवर लक्ष ठेवून त्यांच्यावर कठोर कारवाई करण्याचे पोलिसांकडून प्रयत्न सुरू आहेत. या कारवाईमुळे अवैध दारू निर्मितीला आळा घालण्यासाठी पोलिसांची मोहीम अधिक तीव्र होण्याची अपेक्षा व्यक्त होत आहे.
