यावल-लाईव्ह ट्रेंड्स न्यूज प्रतिनिधी । शहरासह तालुक्यात गेल्या दोन दिवसांपासून सुरू असलेल्या मुसळधार पावसामुळे जनजीवन विस्कळीत झाले असून, राष्ट्रीय महामार्गावरील आठवडे बाजार परिसरात शुक्रवारी एक विशाल वडाचे झाड अचानक रस्त्यावर कोसळल्याने काही काळ वाहतूक विस्कळीत झाली. सुदैवाने या घटनेत कोणतीही जीवितहानी झाली नाही. मात्र, रस्त्यालगत उभ्या असलेल्या दोन ऑटो रिक्षांचे नुकसान झाले असून मोठी दुर्घटना थोडक्यात टळली.
शुक्रवारी आठवडे बाजार असल्याने या परिसरात नागरिकांची मोठी वर्दळ होती. सार्वजनिक बांधकाम विभागाच्या कार्यालयासमोरील जुने वडाचे झाड सततच्या मुसळधार पावसामुळे अचानक रस्त्याच्या कडेला कोसळले. झाड कोसळताच परिसरात एकच धावपळ उडाली. घटनेच्या वेळी रस्त्यावरून वाहने ये-जा करत असतानाही सुदैवाने कोणालाही दुखापत झाली नाही.
झाड कोसळल्याने रस्त्याच्या कडेला उभ्या असलेल्या दोन ऑटो रिक्षांचे नुकसान झाले. काही काळ वाहतूकही प्रभावित झाली होती. घटनेची माहिती मिळताच सार्वजनिक बांधकाम विभागाचे वरिष्ठ लिपिक विकास जंजाळे यांनी तत्काळ घटनास्थळी धाव घेतली. मजुरांच्या मदतीने झाड बाजूला करून रस्ता वाहतुकीसाठी खुला करण्यात आला.
दरम्यान, यावल ते फैजपूर या राष्ट्रीय महामार्गालगत अनेक जुनी व धोकादायक झाडे उभी असल्याचे नागरिकांनी निदर्शनास आणून दिले आहे. सततच्या पावसामुळे ही झाडे कधीही कोसळू शकतात. त्यामुळे संभाव्य अपघात टाळण्यासाठी सार्वजनिक बांधकाम विभागाने तातडीने सर्वेक्षण करून धोकादायक झाडांवर आवश्यक उपाययोजना कराव्यात, अशी मागणी नागरिकांकडून होत आहे.
गेल्या दोन दिवसांपासून यावल तालुक्यात सुरू असलेल्या मुसळधार पावसामुळे नदी-नाले दुथडी भरून वाहत असून अनेक भागांमध्ये जलमय परिस्थिती निर्माण झाली आहे. अशा स्थितीत नागरिकांनी अनावश्यक प्रवास टाळावा तसेच वादळी वाऱ्यामुळे किंवा पावसामुळे धोकादायक झाडांच्या परिसरात थांबू नये, असे आवाहनही करण्यात येत आहे.
या घटनेत सुदैवाने जीवितहानी टळली असली तरी भविष्यात अशा घटना टाळण्यासाठी धोकादायक झाडांची तातडीने छाटणी किंवा विल्हेवाट लावण्याची गरज अधोरेखित झाली आहे. प्रशासनाने याकडे गांभीर्याने लक्ष देऊन राष्ट्रीय महामार्गावरील नागरिकांच्या सुरक्षिततेसाठी त्वरित उपाययोजना कराव्यात, अशी अपेक्षा व्यक्त होत आहे.
