जळगाव-लाईव्ह ट्रेंड्स न्यूज प्रतिनिधी । जळगाव शहरात बकरी ईदचा पवित्र सण शनिवारी मोठ्या उत्साहात, भक्तिमय वातावरणात आणि सामाजिक सलोख्याच्या भावनेत साजरा करण्यात आला. ईदच्या निमित्ताने शहरातील ईदगाह मैदान ट्रस्ट परिसरात सकाळी साडेसात वाजल्यापासून मुस्लिम बांधवांची मोठी गर्दी पाहायला मिळाली. हजारो नागरिकांनी एकत्र येत अत्यंत शिस्तबद्ध पद्धतीने ईदची नमाज अदा केली. विश्वशांती, देशात बंधुभाव कायम राहावा आणि समाजात सौहार्द वृद्धिंगत व्हावे यासाठी विशेष प्रार्थना करण्यात आली. सणाच्या पार्श्वभूमीवर शहरात आनंदाचे आणि उत्साहाचे वातावरण निर्माण झाले होते.
बकरी ईदच्या निमित्ताने ईदगाह मैदानावर सकाळपासूनच धार्मिक वातावरण अनुभवायला मिळाले. पारंपरिक वेशभूषेत मोठ्या संख्येने मुस्लिम समाजबांधव नमाजासाठी उपस्थित होते. मौलाना उस्मान कासमी यांनी नमाज पठण करून घेतले. नमाजानंतर उपस्थितांना संबोधित करताना त्यांनी शांतता, बंधुभाव आणि समाजातील एकोप्याचा संदेश दिला. ईद हा केवळ धार्मिक सण नसून एकमेकांबद्दल प्रेम, सहकार्य आणि माणुसकी जपण्याचा संदेश देणारा दिवस असल्याचे त्यांनी सांगितले. या प्रसंगी देशाच्या प्रगतीसाठी, सर्वांच्या सुख-समृद्धीसाठी आणि विश्वशांतीसाठी सामूहिक दुआ करण्यात आली.
नमाज पूर्ण झाल्यानंतर मुस्लिम बांधवांनी एकमेकांना भेटून बकरी ईदच्या शुभेच्छा दिल्या. अनेकांनी एकमेकांना आलिंगन देत “ईद मुबारक”च्या शुभेच्छा व्यक्त केल्या. लहान मुलांपासून ज्येष्ठांपर्यंत सर्वांमध्ये आनंदाचे वातावरण दिसून आले. ईदगाह परिसरात कुटुंबांसह आलेल्या नागरिकांनी धार्मिक विधींमध्ये सहभाग घेत सणाचा आनंद साजरा केला.
सण शांततेत आणि सुव्यवस्थेत पार पडावा यासाठी जळगाव जिल्हा पोलीस प्रशासनाकडून ईदगाह मैदान परिसरात चोख बंदोबस्त ठेवण्यात आला होता. सुरक्षेच्या दृष्टीने पोलिसांचा मोठा ताफा तैनात करण्यात आला होता. नमाज पठण पूर्ण झाल्यानंतर पोलीस प्रशासनातील वरिष्ठ अधिकाऱ्यांनी मुस्लिम समाजबांधवांची भेट घेत त्यांना बकरी ईदच्या शुभेच्छा दिल्या.
जिल्हा पोलीस अधीक्षक श्रीकांत धिवरे, अप्पर पोलीस अधीक्षक संदीप गावित, उपविभागीय अधिकारी नितीन गणापुरे तसेच एमआयडीसी पोलीस स्टेशनचे पोलीस निरीक्षक बबन आव्हाड यांनी समाजबांधवांना गुलाब पुष्प देऊन स्वागत केले. पोलीस प्रशासनाच्या या उपक्रमामुळे जळगावमध्ये सामाजिक सलोखा आणि परस्पर सन्मानाचे सुंदर दर्शन घडले. नागरिकांनीही या उपक्रमाचे स्वागत करत प्रशासनाचे कौतुक केले.
