राज्यात परिचारिकांची तब्बल ८ हजार पदे रिक्त !

महाराष्ट्र नर्सिंग फेडरेशनच्या अध्यक्षा इंदुमती थोरात यांनी दिलेल्या माहितीनुसार, वैद्यकीय शिक्षण विभागात सर्वाधिक ५ हजार पदे रिक्त आहेत. याशिवाय आरोग्य विभागातील २५ हजार २७४ मंजूर पदांपैकी ३ हजार ४१० पदे अद्याप भरलेली नाहीत. परिणामी, अनेक सरकारी रुग्णालयांमध्ये रुग्णसेवा देताना परिचारिकांना दुप्पट जबाबदाऱ्या सांभाळाव्या लागत आहेत.

रिक्त पदांमुळे वॉर्डातील दैनंदिन कामकाजावर थेट परिणाम होत आहे. एखादी परिचारिका रजेवर गेली किंवा प्रशिक्षणासाठी बाहेर गेल्यास उर्वरित कर्मचाऱ्यांवर अतिरिक्त भार पडतो. यामुळे कामाचे तास वाढत असून मानसिक आणि शारीरिक ताणही वाढत असल्याची भावना परिचारिका व्यक्त करत आहेत.

दरम्यान, घाटी रुग्णालय येथे वरिष्ठ प्रशासकीय पदांची परिस्थिती अधिक गंभीर असल्याचे समोर आले आहे. रुग्णालयातील ६९४ मंजूर पदांपैकी ६२ पदे रिक्त आहेत. परिसेविकांची ८८ पैकी २६ पदे भरलेली नसून विभागीय अधिसेविकेच्या १४ पैकी तब्बल ११ पदांवर नियुक्ती झालेली नाही. विशेष म्हणजे मेट्रनची दोन्ही पदे रिक्त असल्याने प्रशासन आणि कामकाजाचे नियोजन करताना अडचणी निर्माण होत आहेत.

लेबर रूम, ऑपरेशन थिएटर आणि नवजात शिशू विभागात परिस्थिती अधिक आव्हानात्मक बनली आहे. दररोज होणाऱ्या २० ते २५ सिझर शस्त्रक्रियांदरम्यान परिचारिकांना सलग आठ-आठ तास उभे राहून सेवा द्यावी लागत आहे. बाळ जन्मल्यापासून त्याचे दस्तऐवजीकरण, ठसे घेणे आणि सुरक्षितपणे आईपर्यंत पोहोचवण्यापर्यंतची संपूर्ण जबाबदारी परिचारिकांवरच असते.

परिसेविका रंजना नागरे यांनी सांगितले की, “लेबर रूममधील ओटीतील काम परिचारिकांसाठी अत्यंत आव्हानात्मक असते. सलग उभे राहून बाळाला रिसीव्ह करणे, ठसे घेणे आणि सर्व डॉक्युमेंटेशन पूर्ण करावे लागते. मात्र प्रत्येक परिचारिका पूर्ण ताकदीने आणि समर्पणाने हे काम करत असते.”

तर एनआयसीयू विभागातील नर्सिंग ऑफिसर प्रमिला गुडेकर यांनी सांगितले की, “प्री-टर्म बाळे आईपासून दूर असल्याने त्यांचे संगोपन आम्हालाच करावे लागते. बाळांना त्रास होऊ नये म्हणून शांत वातावरणात आम्ही त्यांचा आईच्या मायेने सांभाळ करतो.”

राज्यातील वाढत्या रुग्णसंख्येच्या पार्श्वभूमीवर परिचारिकांची रिक्त पदे तातडीने भरण्याची मागणी आता अधिक तीव्र होत आहे. अन्यथा सरकारी आरोग्य व्यवस्थेवरील ताण आणखी वाढण्याची भीती व्यक्त केली जात आहे.