परभणी- वृत्तसेवा। राज्यातील पोस्ट व पासपोर्ट कार्यालयांना आरडीएक्स बॉम्बने उडवण्याची धमकी देणारा ई-मेल प्राप्त झाल्याने बुधवारी प्रशासनात एकच खळबळ उडाली असून काही काळासाठी भीतीचे वातावरण निर्माण झाले होते.
दुपारी सुमारे १२:१० वाजता सायनाईड मिश्रित १६ आरडीएक्स बॉम्बचा स्फोट होणार असल्याचा गंभीर इशारा संबंधित ई-मेलमध्ये देण्यात आला होता. या धमकीनंतर परभणीसह राज्यातील सर्व पोस्ट कार्यालयांमध्ये तात्काळ सतर्कता बाळगण्यात आली. प्रशासनाने खबरदारीचा उपाय म्हणून विविध कार्यालयांची तपासणी सुरू केली, तर काही ठिकाणी नागरिकांना सुरक्षिततेच्या दृष्टीने बाहेर जाण्याचा सल्ला देण्यात आला.
या पार्श्वभूमीवर कर्मचाऱ्यांना दक्ष राहण्याचे आदेश देण्यात आले होते. पोलिस व सुरक्षा यंत्रणांनी कार्यालय परिसराची सखोल पाहणी करत कोणतीही अनुचित घटना घडू नये यासाठी विशेष उपाययोजना केल्या. परभणी प्रशासनाने या घटनेची तातडीने दखल घेत वरिष्ठ अधिकाऱ्यांना माहिती देऊन संपूर्ण परिस्थितीवर बारकाईने लक्ष ठेवले.
दरम्यान, नमूद वेळ उलटल्यानंतर कोणताही स्फोट किंवा संशयास्पद हालचाल आढळून न आल्याने प्रशासनाने सुटकेचा निश्वास सोडला. मात्र या घटनेमुळे काही काळ नागरिकांमध्ये घबराटीचे वातावरण निर्माण झाले होते.
प्राथमिक तपासात हा ई-मेल तामिळनाडू राज्यातून पाठविण्यात आल्याचा अंदाज व्यक्त करण्यात आला आहे. संबंधित यंत्रणांकडून या प्रकरणाचा पुढील तपास सुरू असून अशा प्रकारच्या खोट्या धमक्या देणाऱ्यांवर कठोर कारवाई केली जाईल, असा इशारा प्रशासनाने दिला आहे. तसेच नागरिकांनी कोणत्याही अफवांवर विश्वास न ठेवता प्रशासनाला सहकार्य करावे, असे आवाहन करण्यात आले आहे.
या घटनेने सुरक्षाव्यवस्थेचा प्रश्न पुन्हा ऐरणीवर आला असून प्रशासनाने सतर्कता वाढविण्याची गरज अधोरेखित झाली आहे. भविष्यात अशा प्रकारच्या घटनांना आळा घालण्यासाठी अधिक कठोर उपाययोजना करण्यात येणार असल्याचे संकेतही मिळत आहेत.
