काबूल/इस्लामाबाद- वृत्तसेवा । अफगाणिस्तान आणि पाकिस्तान यांच्यातील तणाव पुन्हा एकदा चिघळला असून तालिबानने पाकिस्तानातील महत्त्वाच्या लष्करी आणि हवाई तळांवर ड्रोन हल्ले केल्याचा दावा केला आहे. या कारवाईत रावळपिंडीतील नूर खान एअर बेससह क्वेटा आणि खैबर पख्तुनख्वा प्रांतातील तळांना लक्ष्य केल्याचे तालिबानच्या संरक्षण मंत्रालयाने म्हटले आहे. या हल्ल्यांमुळे दोन्ही देशांतील संघर्ष आणखी तीव्र होण्याची शक्यता वर्तवली जात आहे.
तालिबानच्या संरक्षण मंत्रालयाने प्रसिद्ध केलेल्या निवेदनात रावळपिंडी येथील नूर खान एअर बेस, बलुचिस्तानमधील क्वेटा येथील १२ व्या डिव्हिजनचे मुख्यालय तसेच खैबर पख्तुनख्वामधील मोहम्मद एजन्सीतील ख्वाजाई कॅम्प या प्रमुख लष्करी तळांना लक्ष्य करण्यात आल्याचे नमूद केले आहे. इस्लामाबाद परिसरातही ड्रोनच्या हालचाली झाल्याचा दावा करण्यात आला आहे. या हल्ल्यांमागे पाकिस्तानने अफगाण हवाई हद्दीचे उल्लंघन केल्याचा आरोप तालिबानने केला आहे.
तालिबानने स्पष्ट इशारा देत म्हटले आहे की, पाकिस्तानकडून हवाई हल्ले किंवा सीमाभंग सुरूच राहिल्यास आणखी तीव्र प्रत्युत्तर दिले जाईल. पाकिस्तानने काबूलजवळील बगराम हवाई तळावर हल्ल्याचा प्रयत्न केल्याचा आरोप करत आजचे ड्रोन हल्ले हे त्याच कारवाईला दिलेले उत्तर असल्याचे तालिबानने सांगितले. राजधानी काबूलमध्ये अलीकडेच गोळीबार आणि स्फोटांचे आवाज ऐकू आल्याचा उल्लेखही करण्यात आला आहे.
दरम्यान, अफगाणिस्तानातील वृत्तसंस्था TOLOnews यांनी दिलेल्या वृत्तानुसार, शनिवारी आणि रविवारी पाकिस्तानकडून काबूल, बगराम तसेच इतर भागांमध्ये बॉम्बहल्ले करण्यात आल्याचा आरोप करण्यात आला आहे. त्याला प्रत्युत्तर म्हणून ड्रोन हल्ले करण्यात आले असून या कारवाईत पाकिस्तानचे ३२ सैनिक ठार झाल्याचा दावा तालिबानने केला आहे. मात्र, पाकिस्तानकडून याबाबत अधिकृत पुष्टी मिळालेली नाही.
या घडामोडींमुळे दक्षिण आशियातील सुरक्षेच्या समीकरणांवर परिणाम होण्याची शक्यता व्यक्त केली जात आहे. सीमावाद, दहशतवादविरोधी कारवाया आणि परस्पर आरोप-प्रत्यारोप यांच्या पार्श्वभूमीवर दोन्ही देशांतील तणाव कमी होण्याऐवजी वाढताना दिसत आहे.
