नवी दिल्ली-वृत्तसेवा । मंगळवारी विरोधी पक्षांनी लोकसभा अध्यक्ष ओम बिर्ला यांच्याविरोधात अविश्वास प्रस्तावाची नोटीस सादर केली आहे. या प्रस्तावावर ११८ खासदारांच्या स्वाक्षऱ्या आहेत.
सूत्रांच्या हवाल्याने आयएएनएस वृत्तसंस्थेने दिलेल्या माहितीनुसार, अविश्वास प्रस्तावावर निर्णय होईपर्यंत ओम बिर्ला लोकसभेत उपस्थित राहणार नसल्याची शक्यता आहे. प्रस्ताव बाद झाल्यानंतरच ते पुन्हा अध्यक्षपदाची सूत्रे स्वीकारतील, असा दावा करण्यात आला आहे.
एजन्सीनुसार, ९ मार्च रोजी या अविश्वास प्रस्तावावर लोकसभेत चर्चा होऊ शकते. सध्या सुरू असलेल्या अर्थसंकल्पीय अधिवेशनाचा शेवटचा दिवस १३ फेब्रुवारी आहे. त्यानंतर ८ मार्चपासून संसदेचे कामकाज पुन्हा सुरू होणार आहे.
दरम्यान, अर्थसंकल्पीय अधिवेशनाच्या दहाव्या दिवशी संसद दोनदा तहकूब झाली होती. त्यामुळे दुपारी २ वाजल्यानंतरच कामकाज सुरू झाले. यावेळी शशी थरूर यांनी अर्थसंकल्पावरील चर्चेला सुरुवात केली.
