पाचोरा-लाईव्ह ट्रेंडस न्यूज प्रतिनिधी । पाचोरा शहरात माणुसकीला काळिमा फासणारी धक्कादायक घटना उघडकीस आली आहे. एका १७ वर्षीय अल्पवयीन मुलीला फोटो व्हायरल करण्याची भीती दाखवून तिच्यावर अत्याचार केल्याप्रकरणी पाचोरा पोलीस ठाण्यात तीन जणांविरुद्ध गुन्हा दाखल करण्यात आला आहे. पोलिसांनी यातील दोन आरोपींना तातडीने अटक केली आहे.
मिळालेल्या माहितीनुसार, मे २०२५ ते नोव्हेंबर २०२५ या कालावधीत काकणबर्डी परिसर आणि अंतुली रोडवरील शेतात ही घटना घडली. पीडित मुलगी अल्पवयीन असल्याचे माहित असूनही आरोपी पवन संजय परदेशी आणि प्रथमेश पाटील (दोघे रा. पाचोरा) यांनी तिला फोटो व्हायरल करण्याची धमकी दिली. या भीतीपोटी पीडितेवर आरोपींनी वेळोवेळी आळीपाळीने तिच्यावर अत्याचार केला. याशिवाय, तिसरा आरोपी विकी शिवाजी राजपूत याने पीडितेचा वारंवार पाठलाग करून तिचा विनयभंग केल्याचा आरोप फिर्यादीत करण्यात आला आहे.
याप्रकरणी पीडितेने दिलेल्या फिर्यादीवरून २१ जानेवारी रोजी पाचोरा पोलीस ठाण्यात गुन्हा दाखल करण्यात आला आहे. उपविभागीय पोलीस अधिकारी आणि पोलीस निरीक्षक राहुलकुमार निहाळ यांनी घटनास्थळी भेट दिली आहे. पोलीस उपनिरीक्षक योगेश गणगे या प्रकरणाचा अधिक तपास करत असून, पवन परदेशी आणि प्रथमेश पाटील या दोन आरोपींना अटक करण्यात आली आहे.
