जळगाव-लाईव्ह ट्रेंड्स न्यूज प्रतिनिधी । यश कोणत्याही क्षेत्रात सहज मिळत नाही, त्यासाठी जिद्द, सातत्य आणि अखंड साधना आवश्यक असते, असे ठाम मत व्यक्त करत कलेच्या क्षेत्रात प्रयत्नांना अनन्यसाधारण महत्त्व असल्याचे प्रतिपादन चोपडा येथील प्राचार्य राजेंद्र महाजन यांनी केले. जळगाव येथे भरविण्यात आलेल्या चित्रप्रदर्शनाच्या उद्घाटनप्रसंगी ते बोलत होते. नाशिकचे चित्रकार योगेश साळी यांच्या चित्रांमधून त्यांच्या मेहनतीचा आणि कलासाधनेचा प्रवास स्पष्टपणे दिसून येतो, असेही त्यांनी नमूद केले.
नाशिक येथील सुप्रसिद्ध चित्रकार योगेश रमेश साळी यांच्या एकल चित्रप्रदर्शनाचे आयोजन जळगावमधील पु. ना. गाडगीळ अँड सन्स यांच्या कलादालनात करण्यात आले आहे. या प्रदर्शनाचे उद्घाटन प्राचार्य राजेंद्र महाजन यांच्या हस्ते उत्साहपूर्ण वातावरणात पार पडले. उद्घाटनप्रसंगी व्यासपीठावर पु. ना. गाडगीळ अँड सन्सचे व्यवस्थापक गिरीश डेरे, ज्येष्ठ कलाशिक्षक व मुख्याध्यापक वसंत नागपुरे तसेच चित्रकार पद्माकर कोळी हे प्रमुख पाहुणे म्हणून उपस्थित होते.
या कार्यक्रमाला कला क्षेत्रातील अनेक नामवंत व्यक्तींनी उपस्थिती लावली. जैन इरिगेशनचे चित्रकार विजय जैन, चित्र-शिल्पकार निरंजन शेलार, कलाशिक्षिका अर्चना शेलार, उपयोजित चित्रकार सुभाष सोनवणे, सुनील साळी, जयश्री साळी आणि महेश दांडगे यांच्यासह अनेक कलाप्रेमींनी या प्रदर्शनाला भेट दिली. उपस्थित मान्यवरांनी योगेश साळी यांच्या चित्रशैलीचे, रंगसंगतीचे आणि विषयांच्या वैविध्याचे भरभरून कौतुक केले.
योगेश साळी यांच्या चित्रांमध्ये नाशिकच्या निसर्गसौंदर्याचा, ग्रामीण जीवनाचा तसेच विविध सामाजिक आणि भावनिक विषयांचा प्रभाव जाणवतो. त्यांच्या कुंचल्यातून साकारलेली प्रत्येक कलाकृती प्रेक्षकांशी संवाद साधताना दिसून येते. या चित्रप्रदर्शनातून नवोदित कलाकारांनाही प्रेरणा मिळेल, असा विश्वास आयोजकांनी व्यक्त केला आहे.
हे चित्रप्रदर्शन ३१ जानेवारीपर्यंत सकाळी १० ते रात्री ८ या वेळेत सर्व नागरिकांसाठी विनामूल्य खुले ठेवण्यात आले आहे. जळगाव शहरातील कलाप्रेमी, विद्यार्थी आणि नागरिकांनी या संधीचा लाभ घेऊन चित्रकलेचा आस्वाद घ्यावा, असे आवाहन चित्रकार योगेश साळी यांनी केले आहे.
