यावल-लाईव्ह ट्रेंड्स न्यूज प्रतिनिधी । यावल नगरपालिकेच्या राजकीय घडामोडींमध्ये आज महत्त्वाचा टप्पा नोंदवला गेला असून उपनगराध्यक्ष आणि स्वीकृत सदस्यपदाच्या निवडीतून सत्तासमीकरण स्पष्ट झाले आहे. नगरपालिकेच्या पहिल्याच सर्वसाधारण सभेत लोकनियुक्त प्रतिनिधींच्या उपस्थितीत ही निवड प्रक्रिया पार पडली.
यावल नगरपालिकेच्या उपनगराध्यक्षपदी महाविकास आघाडीतील काँग्रेस गटाच्या सईदाबी शेख मोहम्मद याकुब यांची निवड करण्यात आली आहे. तसेच स्वीकृत सदस्यपदी महाविकास आघाडीचे अतुल वसंत पाटील आणि भारतीय जनता पक्षाच्या गटातून उमाकांत रेवा फेगडे यांची निवड करण्यात आली आहे. ही निवड आज १५ जानेवारी रोजी नगरपालिकेच्या सभागृहात पार पडली.
लोकनियुक्त नगराध्यक्ष सौ. छाया अतुल पाटील यांच्या अध्यक्षतेखाली ही सर्वसाधारण सभा संपन्न झाली. नगरपालिकेच्या पहिल्या सर्वसाधारण सभेत सर्व २३ नगरसेवकांची उपस्थिती होती, त्यामुळे सभेचे वातावरण चैतन्यपूर्ण आणि उत्साही होते.
उपनगराध्यक्षपदाच्या निवडीसाठी झालेल्या मतदानात राष्ट्रवादी काँग्रेस (अजित पवार गट) तर्फे अंजुम बी कदीर खान यांना ४ मते मिळाली. भारतीय जनता पक्षाकडून उपनगराध्यक्षपदासाठी रुबाब महमंद तडवी यांना ८ मते प्राप्त झाली. तर महाविकास आघाडी काँग्रेसच्या सईदाबी शेख मोहम्मद याकुब यांना सर्वाधिक १२ मते मिळाल्याने त्यांची उपनगराध्यक्षपदी निवड घोषित करण्यात आली.
या सर्वसाधारण सभेचे कामकाज मुख्याधिकारी निशीकांत गवई आणि सहमुख्याधिकारी रविकांत डांगे यांच्या मार्गदर्शनाखाली पार पडले. निवडणूक प्रक्रिया पारदर्शक आणि नियमबद्ध पद्धतीने राबवण्यात आल्याचे प्रशासनाकडून सांगण्यात आले.
निवडीचा निकाल जाहीर होताच सभागृहाबाहेर विविध पक्षांच्या पदाधिकारी व कार्यकर्त्यांनी घोषणाबाजी करत जल्लोष केला. फटाक्यांच्या आतषबाजीत आणि जल्लोषात नवनिर्वाचित पदाधिकाऱ्यांचे अभिनंदन करण्यात आले.
