जळगाव-लाईव्ह ट्रेंडस न्यूज प्रतिनिधी । जळगाव महानगरपालिकेसाठी मतदान प्रक्रिया गुरूवारी १५ जानेवारी रोजी पार पडणार आहे. या पार्श्वभूमीवर जळगाव जिल्हा प्रशासन आणि निवडणूक विभागाने आपली सर्व तयारी पूर्ण केली असून, गुरुवारी सकाळी ७:३० वाजल्यापासून मतदानाला प्रारंभ होणार आहे.
साहित्य वाटप आणि कर्मचाऱ्यांची रवानगी :
एमआयडीसी परिसरातील वखार महामंडळाच्या गोडाऊनमधून आज सकाळपासूनच निवडणूक साहित्याचे वाटप करण्यात आले. यामध्ये ईव्हीएम मशीन्स (EVM), व्हीव्हीपॅट (VVPAT) आणि इतर आवश्यक साहित्याचा समावेश होता. जळगाव शहराच्या या मतदान प्रक्रियेसाठी एकूण ३०५५ अधिकारी व कर्मचाऱ्यांची नियुक्ती करण्यात आली आहे. साहित्याचे वाटप झाल्यानंतर सर्व पथके आपापल्या नियुक्त मतदान केंद्रांकडे रवाना झाली आहेत.
निवडणुकीचे गणित :
जळगाव महानगरपालिकेच्या एकूण ७५ जागांसाठी ही निवडणूक प्रक्रिया राबवली जात आहे. विशेष म्हणजे, यातील १२ उमेदवार यापूर्वीच बिनविरोध निवडून आले आहेत. त्यामुळे आता प्रत्यक्षात ६३ जागांसाठी निवडणूक होत असून, त्यासाठी ३२१ उमेदवार रिंगणात आहेत. या उमेदवारांचे भवितव्य उद्या शहरातील लाखो मतदार ठरवणार आहेत.
कडक सुरक्षा व्यवस्था :
मतदान केंद्रांवर कोणत्याही प्रकारचा गोंधळ होऊ नये, यासाठी पोलीस प्रशासनाकडून चोख बंदोबस्त तैनात करण्यात आला आहे. वखार महामंडळाच्या गोडाऊनमध्ये साहित्य वाटप करतानाही मोठा पोलीस ताफा हजर होता. उद्या सकाळी ७:३० ते सायंकाळी ५:३० या वेळेत नागरिकांना मतदानाचा हक्क बजावता येईल. प्रशासनाने मतदारांना निर्भयपणे घराबाहेर पडण्याचे आणि लोकशाहीच्या या उत्सवात सहभागी होण्याचे आवाहन केले आहे. उद्याच्या मतदानानंतर जळगावच्या सत्तेची सूत्रे कोणाच्या हाती जाणार, याकडे संपूर्ण राज्याचे लक्ष लागले आहे.
