जळगाव-लाईव्ह ट्रेंडस न्यूज प्रतिनिधी । जळगाव शहरातील अयोध्या नगर परिसरातील ‘शिवम योगा सेंटर’ येथे नुकताच हळदी-कुंकू समारंभाचे आयोजन करण्यात आले होते. प्रभाग १६ मधील अपक्ष उमेदवार हर्षाली मनीष कोल्हे आणि इच्छा दीपक अत्तरदे यांच्या पुढाकाराने आयोजित या सोहळ्यात महिलांचा उत्साह ओसंडून वाहत होता. केवळ पारंपरिक सण न राहता, या कार्यक्रमातून महिलांना निवडणुकीबाबत प्रबोधनही करण्यात आले.
उत्साही स्वागत आणि सांस्कृतिक खेळ :
कार्यक्रमाच्या सुरुवातीला हर्षाली कोल्हे आणि इच्छा अत्तरदे यांनी उपस्थित प्रत्येक महिलेचे वैयक्तिकरीत्या स्वागत करून त्यांना हळदी-कुंकू लावले. दैनंदिन घरगुती कामांच्या व्यापातून महिलांना विरंगुळा मिळावा, या उद्देशाने विविध खेळांचे आयोजन करण्यात आले होते. यामध्ये संगीत खुर्ची, फुगडी, लंगडी आणि पारंपरिक गाण्यांच्या स्पर्धा घेण्यात आल्या. अनेक महिलांनी जुन्या आठवणींना उजाळा देत गाण्यांच्या ठेक्यावर ताल धरला, ज्यामुळे संपूर्ण योगा सेंटरचे वातावरण आनंदी झाले होते.
मतदानाचे ‘लाईव्ह’ प्रात्यक्षिक :
या कार्यक्रमाचे खास आकर्षण म्हणजे आगामी महानगरपालिका निवडणुकीसाठी करण्यात आलेले मार्गदर्शन. प्रभाग १६ मध्ये मतदान नेमके कसे करावे, बॅलेट युनिटवर किती जणांना मतदान करायचे आहे आणि मतदानाची अचूक पद्धत काय, याविषयीचे सविस्तर डेमो (प्रात्यक्षिक) महिलांना दाखवण्यात आले. अनेकदा मतदानाबाबत मनात असलेल्या शंकांचे निरसन यावेळी करण्यात आले. सुशिक्षित आणि सजग नागरिक म्हणून आपला हक्क कसा बजवावा, याचे मार्गदर्शन उमेदवार आणि त्यांच्या प्रतिनिधींनी केले.
महिलांची उत्स्फूर्त उपस्थिती :
प्रभाग १६ मधील शेकडो महिलांनी या कार्यक्रमाला हजेरी लावली होती. कोल्हे आणि अत्तरदे परिवाराने आयोजित केलेल्या या उपक्रमाबद्दल महिलांनी समाधान व्यक्त केले. “अशा कार्यक्रमांमुळे मनावरचा ताण हलका होतो आणि आम्हाला उमेदवारांशी थेट संवाद साधता आला,” अशा भावना उपस्थित महिलांनी व्यक्त केल्या. निवडणुकीच्या रणधुमाळीत केवळ भाषणांवर भर न देता, अशा प्रकारे थेट जनसंपर्क आणि प्रबोधन केल्यामुळे या दोन्ही अपक्ष उमेदवारांची सध्या प्रभागात मोठी चर्चा सुरू आहे.
