चाळीसगाव-लाईव्ह ट्रेंडस न्यूज प्रतिनिधी । येथील लोकनियुक्त नगराध्यक्षपदाच्या निवडणुकीत आमदार मंगेश चव्हाण यांच्या सौभाग्यवती प्रतिभाताई चव्हाण यांनी विजय संपादन केला असून या माध्यमातून आमदारांनी मतदारसंघावरील आपली पकड घट्ट असल्याचे दाखवून दिले आहे. चाळीसगाव चाळीसगाव विधानसभा मतदारसंघात यंदा विलक्षण चुरस पहायला मिळाली. अलीकडेच चाळीसगावचे माजी आमदार राजीवदादा देशमुख यांचे अकस्मात निधन झाल्याने राजकीय क्षेत्रात मोठी पोकळी निर्माण झाली असतांनाच नगरपालिका निवडणुकीची घोषणा झाली.
यात भारतीय जनता पक्षाच्या वतीने आमदार मंगेश चव्हाण यांच्या सौभाग्यवती प्रतिभा चव्हाण यांना उमेदवारी देण्यात आली. तर महाविकास आघाडीच्या वतीने शहरविकास आघाडीच्या माध्यमातून माजी नगराध्यक्षा पद्मजाताई राजीव देशमुख यांना उमेदवारीच्या रिंगणात उतरवण्यात आले. याआधी 2019 साली मंगेश चव्हाण आणि राजीव देशमुख यांच्यात आमदारकीची लढत झाली होती. यानंतर सहा वर्षांनी दोघांच्या सौभाग्यवती लोकनियुक्त नगराध्यक्षपदाच्या निवडणुकीत एकमेकांच्या समोर उभ्या ठाकल्या. अर्थात, पुन्हा एकदा चाळीसगावात चव्हाण विरूध्द देशमुख असा सामना रंगल्याने येथील निवडणूक ही लक्षवेधी ठरली. या निवडणुकीत भारतीय जनता पक्षाच्या प्रचाराची धुरा आ. मंगेश चव्हाण यांनी सांभाळली. तर, शहर विकास आघाडीची सूत्रे माजी आमदार तथा खासदार उन्मेष पाटील यांच्याकडे होती.
निवडणुकीची लक्षणीय बाब म्हणजे आ. मंगेश चव्हाण यांनी पाचोरा येथे जाऊन आ. किशोरआप्पा पाटील तर पारोळ्यात माजी आमदार सतीशअण्णा पाटील यांना आव्हान दिले होते. यामुळे या दोन्ही मान्यवरांनी आपापल्या पक्षांची भूमिका सोडून पद्मजाताई देशमुख यांच्या प्रचारासाठी चाळीसगावात सभा घेतल्या. याला भाजपतर्फे प्रत्युत्तर देण्यात आले. अर्थात, दोन्ही बाजूंनी मोठ्या प्रमाणात आरोप-प्रत्यारोप करण्यात आल्याने निवडणुकीच्या काळात येथील वातावरण मोठ्या प्रमाणात तापल्याचे दिसून आले. या पार्श्वभूमिवर, आज रविवार दिनांक 21 डिसेंबर रोजी सकाळी दहा वाजता मतमोजणी सुरू झाली. यात पहिल्या काही टप्प्यांमध्ये दोन्ही उमेदवारांमध्ये चुरस निर्माण झाल्याचे दिसून आले. मात्र प्रतिभाताई चव्हाण यांनी आघाडी घेतल्यानंतर त्या कधीच मागे आल्या नाहीत. यातून त्यांचा विजय साकारला आहे. हा विजय आ. मंगेश चव्हाण यांच्या कामांना जनतेने पाठबळ देणारा ठरल्याची भावना व्यक्त होत आहे.
