यावल–लाईव्ह ट्रेंड्स न्यूज प्रतिनिधी । शिक्षक आणि शिक्षकेतर कर्मचाऱ्यांची कागदपत्रे शालार्थ वेतन प्रणालीमध्ये डिजिटल स्वरूपात नोंदविताना अनेक ठिकाणी तारखा अस्पष्ट दिसणे, तपशील नीट न वाचणे किंवा अपलोड प्रक्रियेत तांत्रिक अडचणी दिसून आल्याने, जळगाव जिल्ह्यातील वेतन व भविष्य निर्वाह निधी पथक (माध्यमिक) यांनी मूळ अभिलेखांच्या पडताळणीसाठी तालुकानिहाय विशेष शिबिरांचे आयोजन केले आहे. १० ते ३१ डिसेंबरदरम्यान होणारी ही शिबिरे अनुदानित व अंशतः अनुदानित शाळांसाठी अत्यावश्यक ठरणार आहेत.
शाळांकडून कर्मचाऱ्यांचे नियुक्ती आदेश, रुजू अहवाल, वैयक्तिक मान्यता आणि शालार्थ आदेश या अत्यावश्यक अभिलेखांची प्रणालीमध्ये अचूक नोंद अपेक्षित आहे. मात्र काही शाळांकडून अपलोड केलेल्या कागदपत्रांमध्ये विसंगती आढळल्याने मूळ प्रतींची प्रत्यक्ष तपासणी करणे आवश्यक बनले आहे. त्यामुळे जिल्ह्यातील सर्व शाळांनी नियोजित तारखांना शिबिरात उपस्थित राहण्याचे आवाहन पथकाने केले आहे.
प्रत्येक शाळेने मूळ नियुक्ती आदेश, संस्थेचे नियुक्ती आदेश, रुजू अहवाल, वैयक्तिक मान्यता आदेश, शालार्थ आदेश अशी सर्व कागदपत्रे सोबत आणणे आवश्यक आहे. या कागदपत्रांचे तीन झेरॉक्स संच मुख्याध्यापकांच्या सहीने साक्षांकित असणे बंधनकारक आहे. संबंधित शाळेचा लिपिक प्रत्यक्ष कार्यालयात कागदपत्रे सादर करणार आहे.
तालुकानिहाय पडताळणी शिबिरांचे वेळापत्रकही निश्चित करण्यात आले आहे. सकाळी ११ ते सायंकाळी ५ या वेळेत रावेर १० डिसेंबर, यावल ११ डिसेंबर, चोपडा १२ डिसेंबर, अमळनेर १५ डिसेंबर, मुक्ताईनगर १६ डिसेंबर, जामनेर १७ डिसेंबर, जळगाव १८ डिसेंबर, भुसावळ १९ डिसेंबर, पारोळा २२ डिसेंबर, भडगाव २३ डिसेंबर, पाचोरा २४ डिसेंबर, बोदवड २६ डिसेंबर, चाळीसगाव २९ डिसेंबर, धरणगाव ३० डिसेंबर आणि एरंडोल ३१ डिसेंबर रोजी शिबिरे पार पडणार आहेत.
जिल्ह्यातील सर्व अनुदानित व अंशतः अनुदानित शाळांना दिलेल्या सूचनांमध्ये स्पष्ट नमूद केले आहे की, निर्धारित तारखेला सर्व आवश्यक अभिलेखांसह हजर राहिल्यास शालार्थ वेतन प्रणालीतील डिजिटल अभिलेखन प्रक्रिया अधिक सुरळीत आणि विश्वसनीय होईल.
शालार्थ वेतन प्रणालीतील कागदपत्रांमध्ये आढळलेल्या विसंगती दूर करण्यासाठी जळगाव जिल्ह्यात १० ते ३१ डिसेंबरदरम्यान तालुकानिहाय पडताळणी शिबिरे आयोजित करण्यात आली आहेत. शाळांनी मूळ कागदपत्रांसह अनिवार्यपणे उपस्थित राहावे, असे आवाहन करण्यात आले आहे.
