यावल-लाईव्ह ट्रेंड्स न्यूज प्रतिनिधी । यावल शहरात विजयादशमीच्या मंगलप्रसंगी राष्ट्रीय स्वयंसेवक संघाच्या शताब्दी वर्षानिमित्त भव्य उत्सव आणि पथसंचलनाचे आयोजन करण्यात आले. हिंदू समाजाच्या संघटनासाठी आणि विश्वशांतीच्या दिशेने कार्य करण्याच्या उद्देशाने घेतलेल्या या कार्यक्रमात देशभक्तीची प्रेरणा देणारा माहोल पाहायला मिळाला. बसस्थानकाजवळील विशाल मैदान या सोहळ्याचे साक्षीदार ठरले.
राष्ट्रीय स्वयंसेवक संघाच्या यावल तालुका शाखेच्या वतीने आयोजित या शताब्दी विशेष कार्यक्रमास अखिल भारतीय धर्म जनजागरण गतिविधीचे प्रमुख शरदराव ढोले हे प्रमुख मार्गदर्शक म्हणून उपस्थित होते. त्यांनी आपल्या मार्गदर्शनातून संघाचे कार्य, हिंदू समाजाचे ऐक्य व राष्ट्रीय मूल्यांचे महत्व अधोरेखित केले. विजयादशमीचे औचित्य साधून शस्त्र पूजनही अत्यंत धार्मिक वातावरणात पार पडले.
कार्यक्रमाची सुरुवात प्रमोद नेमाडे यांच्या प्रस्तावनेने झाली. त्यांनी संघाच्या कार्यपद्धतीविषयी आणि या विशेष पर्वाचे महत्त्व विशद केले. कार्यक्रमाचे सूत्रसंचालन डॉ. विजय सोनी यांनी प्रभावीपणे पार पाडले. मैदानावर विविध वयोगटातील शेकडो स्वयंसेवक पारंपरिक गणवेशात शिस्तबद्ध पथसंचलनात सहभागी झाले. या पथसंचलनाने संपूर्ण परिसरात राष्ट्रभक्तीची लहर पसरली.
शहरातील विविध भागांतून मार्गक्रमण करताना नागरिकांनी स्वयंसेवकांचे उत्स्फूर्त स्वागत केले. पथसंचलनादरम्यान देशभक्तिपर घोषणांनी वातावरण दुमदुमले. अनेक ठिकाणी पुष्पवृष्टी करण्यात आली. नागरिकांचा प्रतिसाद आणि उत्सवातील सहभाग पाहता संघकार्याबाबत स्थानिक पातळीवर असलेली जागरूकता स्पष्टपणे जाणवली.
कार्यक्रमाची सांगता राष्ट्रगीताने करण्यात आली. सर्व स्वयंसेवक व उपस्थित नागरिकांनी उभे राहून आदरांजली अर्पण केली. यावेळी सामाजिक सलोखा, एकात्मता आणि सांस्कृतिक वारशाचे महत्व अधोरेखित करणारे विचार मांडले गेले.
या ऐतिहासिक शताब्दी वर्षाच्या प्रारंभाने यावल शहरात राष्ट्रीय स्वयंसेवक संघाच्या कार्याला नवी प्रेरणा मिळाल्याचे वातावरण तयार झाले आहे. विजयादशमीच्या शुभ दिनी पार पडलेला हा उत्सव म्हणजे संघाच्या कार्याची शंभर वर्षांची उज्ज्वल परंपरा आणि भावी वाटचालीचे दर्शन होते.
