मुंबई – लाईव्ह ट्रेंड्स न्यूज वृत्तसेवा । राज्यातील पूरपरिस्थितीमुळे अडचणीत सापडलेल्या बारावीच्या विद्यार्थ्यांसाठी सरकारकडून एक मोठा आणि महत्त्वपूर्ण निर्णय घेण्यात आला आहे. इयत्ता १२वीच्या परीक्षा अर्ज भरण्याच्या मुदतीत वाढ देण्यात आली असून, या निर्णयामुळे हजारो विद्यार्थ्यांना दिलासा मिळाला आहे. उपमुख्यमंत्री एकनाथ शिंदे यांच्या सूचनेनंतर शिक्षणमंत्री दादा भुसे यांनी ही माहिती जाहीर केली आहे.
राज्याच्या अनेक भागांत गेल्या काही दिवसांपासून मुसळधार पावसामुळे पूरपरिस्थिती निर्माण झाली आहे. मराठवाडा, पश्चिम महाराष्ट्र, विदर्भातील अनेक जिल्ह्यांत नद्यांना पूर आले असून, जनजीवन विस्कळीत झाले आहे. अनेक गावांतील विद्यार्थ्यांची वह्या, पुस्तके, दप्तरे पाण्यात वाहून गेली आहेत. काहींच्या शाळा आणि महाविद्यालयेही बाधित झाली आहेत. या पार्श्वभूमीवर विद्यार्थ्यांचे शैक्षणिक नुकसान टाळण्यासाठी परीक्षा अर्ज भरण्याची मुदत वाढवण्याची मागणी जोर धरत होती.
माध्यमांद्वारे पूरग्रस्त भागातील विद्यार्थ्यांनी आपली व्यथा थेट मांडल्यानंतर उपमुख्यमंत्री एकनाथ शिंदे यांनी शिक्षणमंत्री दादा भुसे यांच्याशी संपर्क साधत तत्काळ कार्यवाही करण्याच्या सूचना दिल्या. त्यानंतर शिक्षणमंत्री दादा भुसे यांनी १२वीच्या परीक्षा अर्जासाठी मुदतवाढ जाहीर केली. त्यांनी स्पष्ट केलं की कोणत्याही विद्यार्थ्याचं वर्ष वाया जाता कामा नये, यासाठी सरकार कटिबद्ध आहे. पूरग्रस्त शाळा इमारतींच्या दुरुस्तीचीही योग्य कार्यवाही लवकरच केली जाईल, असेही त्यांनी सांगितले.
दरम्यान, पुढच्या आठवड्यात राज्यभरातील परिस्थितीचा आढावा घेऊन आवश्यक ती अतिरिक्त मदत, उपाययोजना आणि धोरणात्मक निर्णय घेण्यात येणार असल्याचेही दादा भुसे यांनी स्पष्ट केले. पूरग्रस्त जिल्ह्यांत रस्ते, वाहतूक व्यवस्था आणि दळणवळण ठप्प झाल्यामुळे विद्यार्थ्यांना परीक्षा अर्ज भरण्यासाठी शाळांमध्ये जाणे शक्य नव्हते. त्यामुळे ही मुदतवाढ अत्यंत गरजेची होती, हे यामधून स्पष्ट झाले आहे.
राज्यभरातील सुमारे २० जिल्ह्यांमध्ये पावसामुळे मोठ्या प्रमाणावर नुकसान झाले असून, अनेक विद्यार्थी अजूनही परिस्थितीशी झुंज देत आहेत. या निर्णयामुळे त्यांना शैक्षणिक गती कायम ठेवण्यासाठी एक संधी मिळणार आहे.
