जळगाव – लाईव्ह ट्रेंड्स न्यूज प्रतिनिधी । धार्मिक, नैतिक व सांस्कृतिक मूल्यांची पेरणी लहान वयातच झाली पाहिजे, या हेतूने श्री स्वामिनारायण मंदिर, जळगाव येथे सुरू करण्यात आलेल्या बाल संस्कार केंद्राला यशस्वी अडीच वर्षे पूर्ण झाली आहेत. “बालक म्हणजे भविष्यातील समाजाचे शिल्पकार” या तत्त्वज्ञानावर आधारित हा उपक्रम आज जळगाव शहरात प्रेरणादायी आदर्श ठरत आहे.
या केंद्राचा मुख्य उद्देश म्हणजे मुलामुलींमध्ये सद्गुणांची जडणघडण करून त्यांना सुसंस्कारित, जबाबदार आणि आत्मविश्वासू नागरिक बनवणे. ८ ते २५ वयोगटातील मुले–मुली या उपक्रमात उत्स्फूर्तपणे सहभागी होत आहेत. दर रविवारी सकाळी हे वर्ग आयोजित केले जातात, ज्यामध्ये श्लोक पठण, भजन, स्तोत्र, नाटिका, नैतिक गोष्टी, योग, प्रश्नोत्तरं, प्रार्थना इत्यादींचा समावेश असतो. या सत्रांमध्ये मुलांच्या सर्वांगीण विकासावर भर दिला जातो.
साधू–संत आणि सेवाभावी कार्यकर्त्यांच्या मार्गदर्शनामुळे मुलांमध्ये श्रद्धा, प्रामाणिकपणा, सेवा वृत्ती, अनुशासन व देशप्रेमाचे बीज रुजवले जात आहे. गेल्या अडीच वर्षांत या केंद्रातून शेकडो बालकांनी लाभ घेतला असून त्यांच्या वर्तनात लक्षणीय सकारात्मक बदल आढळून आले आहेत. आत्मविश्वासात वाढ, धार्मिक आणि नैतिक विषयांमध्ये रस, शैक्षणिक प्रगती यामुळे पालकही समाधान व्यक्त करत आहेत.
हे केंद्र मुलांच्या धार्मिकतेसोबतच सामाजिक व बौद्धिक आयुष्यालाही घडवत आहे. मंदिर प्रशासन, साधू–संत व सेवाभावी कार्यकर्ते यांच्या समन्वयातून हे कार्य अविरतपणे सुरू असून ते भविष्यातील संस्कारी पिढी घडवण्याचे महत्त्वपूर्ण साधन बनले आहे.
प्रत्येक रविवारी आयोजित होणाऱ्या या सत्रांचा अधिकाधिक मुलांनी लाभ घ्यावा, यासाठी श्री स्वामिनारायण मंदिर प्रशासनाने पालकांना आपल्या पाल्यांना केंद्रात सहभागी करण्याचे आवाहन केले आहे.
