नवी दिल्ली – लाईव्ह ट्रेंड्स न्यूज प्रतिनिधी । रक्षाबंधनाच्या दिवशी दिल्लीच्या जैतपूर भागात एक भीषण दुर्घटना घडली असून, तिच्यात दोन चिमुरड्यांसह आठ जणांचा मृत्यू झाला आहे. शनिवारी (दि. 9 ऑगस्ट) सकाळी साडेनऊच्या सुमारास जैतपूर येथील समाधी स्थळावर बांधलेली सुमारे 100 फूट लांबीची भिंत अचानक कोसळली. या भिंतीच्या खाली असलेल्या झोपड्यांचा अक्षरशः चेंदामेंदा झाला. या घटनेने परिसरात भीतीचं वातावरण पसरलं असून, अजूनही बचावकार्य सुरू आहे.
भिंत कोसळल्यानंतर घटनास्थळी जवळील अनेक झोपड्या मलब्याखाली दबल्या गेल्या. आवाज ऐकून स्थानिक रहिवासी तातडीने मदतीला धावले. काही मिनिटांतच दिल्ली पोलीस, अग्निशमन दल, एनडीआरएफ व प्रशासनाची पथके घटनास्थळी दाखल झाली. जेसीबीच्या साहाय्याने मलबा हटवून बचावकार्य सुरू करण्यात आले. या कारवाईत आतापर्यंत आठ जणांना बाहेर काढण्यात आले असून, त्यांना एम्स ट्रॉमा सेंटर व सफदरजंग रुग्णालयात उपचारासाठी दाखल करण्यात आले. मात्र, दुर्दैवाने त्यांचा मृत्यू उपचारादरम्यान झाला.
मृतांमध्ये रुबीना (25), डॉली (25), रुखसाना (6), हसीना (7) यांच्यासह तिघा पुरुषांचा समावेश आहे. जखमी अवस्थेत हिशबुल नावाच्या व्यक्तीवर रुग्णालयात उपचार सुरू आहेत. मृतांचे कुटुंबीय आणि स्थानिक नागरिक घटनास्थळी विलाप करत असून, प्रशासनाकडून तत्काळ मदतीची मागणी केली जात आहे.
दक्षिण-पूर्व दिल्लीचे डीसीपी हेमंत तिवारी यांनी सांगितले की, घटनेची माहिती मिळताच पोलीस पथक अवघ्या 5-7 मिनिटांत घटनास्थळी पोहोचले. स्थानिकांच्या मदतीने आणि यंत्रसामग्रीच्या साहाय्याने तातडीने मदतकार्य सुरू करण्यात आले. सध्या मलब्याखाली अजून कोणी अडकलं आहे का, याची तपासणी सुरू आहे.
फायर ब्रिगेड अधिकारी मनोज महलावत यांनी सांगितले की, ही भिंत समाधी स्थळावर अनेक वर्षांपूर्वी बांधण्यात आली होती. मात्र, ती खचून कोसळल्याने झोपड्यांमध्ये झोपलेले लोक थेट मलब्याखाली गेले. घटनास्थळी जिल्हाधिकारी डॉ. सरवन बगडिया, DDMA टीम आणि इतर शासकीय अधिकारी उपस्थित असून सखोल चौकशीचा आदेश देण्यात आला आहे.
ही दुर्घटना केवळ एक अपघात नसून, दिल्लीतील झोपडपट्ट्यांमधील असुरक्षित जीवनशैली व दुर्लक्षित पायाभूत सुविधांवर गंभीर प्रश्नचिन्ह उपस्थित करते. या भागात झोपड्यांचा झपाट्याने वाढलेला विस्तार आणि शासन यंत्रणांची उदासीनता यामुळे अशा दुर्घटना भविष्यातही होण्याची शक्यता नाकारता येत नाही.
