जळगाव-लाईव्ह ट्रेंडस न्यूज प्रतिनिधी । जळगाव जिल्हा परिषद अभियंता संघटनेच्या वतीने जिल्हा परिषदेच्या बांधकाम, पाणीपुरवठा आणि सिंचन या महत्त्वाच्या विभागांमधील अभियंत्यांसाठी दोन दिवसीय प्रशिक्षण कार्यशाळेचे उद्घाटन करण्यात आले. जिल्हा परिषदेच्या मुख्य कार्यकारी अधिकारी मीनल करणवाल यांच्या हस्ते या कार्यशाळेचे उद्घाटन झाले.
याप्रसंगी अतिरिक्त मुख्य कार्यकारी अधिकारी रणधीर सोमवंशी, बांधकाम विभागाचे कार्यकारी अभियंता सुनील पाटील, पाणीपुरवठा कार्यकारी अभियंता राहुल जाधव आणि सिंचन विभागाचे कार्यकारी अभियंता अमोल पाटील हे उपस्थित होते. जिल्हा परिषद अभियंता संघटनेच्या या स्तुत्य उपक्रमामुळे अभियंत्यांना त्यांच्या कामात अधिक कार्यक्षम होण्यासाठी मदत मिळणार आहे.
या प्रशिक्षण कार्यशाळेत कनिष्ठ अभियंता, शाखा अभियंता, सहाय्यक अभियंता श्रेणी दोन आणि स्थापत्य अभियांत्रिकी सहाय्यक अशा विविध पदांवरील अभियंत्यांचा समावेश आहे. विशेषतः, जिल्हा परिषदेच्या सेवेत नुकत्याच रुजू झालेल्या नवनियुक्त अभियंत्यांना या कार्यशाळेचा मोठा फायदा होणार आहे. त्यांना तांत्रिक आणि प्रशासकीय कामांची सखोल माहिती देण्यासाठी तसेच त्यांच्या ज्ञानात भर घालण्यासाठी या कार्यशाळेचे आयोजन करण्यात आले आहे.
या कार्यशाळेत मार्गदर्शन करण्यासाठी बाहेरील काही तज्ज्ञ आणि अनुभवी व्यक्तींना (गेस्ट लेक्चरर) आमंत्रित करण्यात आले आहे. त्यांच्या अनुभवाचा आणि ज्ञानाचा लाभ उपस्थित अभियंत्यांना मिळणार आहे. संघटनेचे जिल्हाध्यक्ष तथा शाखा अभियंता, जळगाव, राम घोरपडे यांनी दिलेल्या माहितीनुसार, या प्रशिक्षण कार्यशाळेत सुमारे २०० ते २५० अभियंते सहभागी झाले आहेत. ही कार्यशाळा अभियंत्यांच्या व्यावसायिक विकासासाठी आणि विभागांच्या कामांमध्ये अधिक गती देण्यासाठी महत्त्वपूर्ण ठरणार आहे.
