जळगाव-लाईव्ह ट्रेंड्स न्यूज प्रतिनिधी । नागरिकांना अधिक सुसंस्कृत, सुलभ आणि प्रभावी शासकीय सेवा देण्याच्या दृष्टीने जळगाव तहसील कार्यालयात नव्याने उभारण्यात आलेल्या प्रतीक्षालय, वाचनालय, सेतू सुविधा केंद्र व क्षेत्रीय अधिकारी कार्यालयाच्या इमारतींचे लोकार्पण जलसंपदा व स्वच्छता मंत्री तथा जिल्ह्याचे पालकमंत्री गुलाबराव पाटील यांच्या हस्ते करण्यात आले. या नव्या पायाभूत सुविधांमुळे प्रशासन आणि जनतेमधील संवाद अधिक सुसंवादात्मक आणि सकारात्मक होण्यास मदत होणार आहे.
लोकार्पणप्रसंगी बोलताना पालकमंत्री पाटील यांनी नागरिकाभिमुख प्रशासनाचे महत्त्व अधोरेखित करताना सांगितले की, तहसील कार्यालय हे नागरिकांच्या थेट संपर्कातील केंद्र असल्याने येथे येणाऱ्या प्रत्येक व्यक्तीला सुसंस्कृत, शांत आणि आदरयुक्त अनुभव मिळावा, ही काळाची गरज आहे. नव्याने सुरू करण्यात आलेल्या या सेवा नागरिकांसाठी अधिक सुलभता निर्माण करतील, प्रशासनावरील विश्वास वाढवतील आणि जनसेवेतील गुणवत्ता उंचावतील, असे त्यांनी नमूद केले.
या कार्यक्रमाला उपविभागीय अधिकारी विनय गोसावी, तहसीलदार सौ. शितल राजपूत, नायब तहसीलदार राहुल वाघ, डी. बी. जाधव, मंडळ अधिकारी अजिंक्य आंधळे, अभिजीत येवले, महसूल प्रशासनातील अधिकारी, सेतू केंद्राचे कर्मचारी तसेच अन्य मान्यवर उपस्थित होते. कार्यक्रमाचे प्रास्ताविक तहसीलदार सौ. शितल राजपूत यांनी केले, तर आभारप्रदर्शन नायब तहसीलदार राहुल वाघ यांनी मानले.
नवीन प्रतीक्षालयात नागरिकांच्या मानसिक शांततेसाठी सुमधुर संगीताची व्यवस्था करण्यात आली आहे. तसेच, वाचनालयात हलकीफुलकी व माहितीपर पुस्तके उपलब्ध करून दिली गेली आहेत. या सुविधा नागरिकांच्या प्रतीक्षा वेळेला सकारात्मक आणि आनंददायी बनवण्यास उपयुक्त ठरणार आहेत. सेतू केंद्रातून विविध शासकीय सेवा एकाच छताखाली मिळणार असल्याने कार्यप्रवाह अधिक गतिमान होईल.
या उपक्रमामुळे तहसील कार्यालयाचे वातावरण अधिक आधुनिक, मैत्रीपूर्ण आणि नागरिकाभिमुख होत असल्याचे स्पष्ट दिसून येत आहे. या सुविधा केवळ इमारतींच्या स्वरूपात नव्हे, तर प्रशासनाच्या संवेदनशीलतेचा आणि लोकसेवेच्या बांधिलकीचा ठोस पुरावा ठरत आहेत.
