मुंबई-लाईव्ह ट्रेंडस न्यूज वृत्तसेवा | महायुतीच्या आमदारांनी जनतेमध्ये मिसळून काम करावे, असा मोलाचा सल्ला पंतप्रधान नरेंद्र मोदी यांनी दिला आहे. आज मुंबईत युध्दनौकांचे लोकार्पण केल्यानंतर त्यांनी नवनिर्वाचित महायुती आमदारांशी संवाद साधला. यावेळी त्यांनी सत्ता राबविताना येणाऱ्या अडचणींवर मात करण्यासाठी चार महत्त्वाच्या गोष्टी सांगितल्या.
जनतेशी संपर्क वाढवा आणि कामातून उत्तर द्या
पंतप्रधान मोदी यांनी आवर्जून सांगितले की, आमदारांनी जनतेशी थेट संवाद साधावा. विरोधकांवर टीका करण्यापेक्षा आपल्या कामाच्या माध्यमातून उत्तर देण्यावर भर द्यावा. आपल्या कामाबाबत लोकांच्या प्रतिक्रिया जाणून घ्या. मतदारसंघातील गरजा आणि लोकांची मते समजून घेतल्याने कार्यक्षम योजना आखता येतील.
अभ्यास दौऱ्यांचे आयोजन करा
इतर राज्ये किंवा मतदारसंघांतील उत्तम उपक्रमांचा अभ्यास करण्यासाठी दौऱ्यांचे आयोजन करण्याचा सल्ला मोदींनी दिला. यावेळी त्यांनी मनसे अध्यक्ष राज ठाकरे यांनी 2011 साली गुजरातमध्ये घेतलेल्या अभ्यास दौऱ्याचा उल्लेख केला. या प्रकारच्या दौऱ्यांमुळे नवकल्पना मिळतात आणि त्यांची अंमलबजावणी करता येते, असे मोदी म्हणाले.
कुटुंब आणि आरोग्याची काळजी घ्या
सामाजिक जबाबदाऱ्या सांभाळतानाच आपल्या कुटुंबाकडेही लक्ष द्यावे, अशी आठवण मोदींनी आमदारांना करून दिली. तसेच आरोग्याची विशेष काळजी घेतली पाहिजे, असेही ते म्हणाले. आपली कामे यशस्वीपणे पार पाडण्यासाठी काटेकोर नियोजनाची गरज असल्याचे त्यांनी नमूद केले.
संघटनात्मक एकोप्यावर भर द्या
महायुतीच्या संघटनात्मक वाढीवरही पंतप्रधान मोदींनी भर दिला. महायुतीतील घटक पक्षांच्या नेत्यांशी जवळीक वाढवावी आणि मतदारसंघांतील कार्यालयांना भेटी द्याव्यात, असे सुचवले. गावोगावी “डब्बा पार्टी” आयोजित करून एकोपा बळकट करण्याची कल्पना त्यांनी मांडली.
समाजाशी नाळ जुळवा
पंतप्रधानांनी स्पष्ट केले की, जनतेशी संपर्क वाढवल्याने सरकारच्या योजना अधिक प्रभावीपणे राबविता येतील. लोकांच्या अडचणी समजून घेऊन त्यावर काम करणे हा खरा लोकप्रतिनिधीचा धर्म आहे, असे त्यांनी अधोरेखित केले. पंतप्रधानांच्या या मार्गदर्शनामुळे महायुतीचे नवनिर्वाचित आमदार अधिक परिणामकारक पद्धतीने काम करण्यास सक्षम होतील, अशी अपेक्षा व्यक्त होत आहे.
