जळगाव लाईव्ह ट्रेंडस न्यूज प्रतिनिधी । जळगाव शहरातील जुम्मा वखार परिसरामध्ये दुचाकीने धडक दिल्याने त्याचा जाब विचारल्यावरून जखमी तरुणाला शिवीगाळ करत चापटाबुक्क्यांनी बेदम मारहाण करून गंभीर दुखापत केल्याची घटना गुरुवार ५ डिसेंबर रोजी सकाळी ९ वाजता घडली आहे. याप्रकरणी सायंकाळी ७ वाजता एमआयडीसी पोलीस ठाण्यात अज्ञात दुचाकीधारकावर गुन्हा दाखल करण्यात आला आहे.
दीपक भिका काळनोद वय-४५, रा.नेहरूनगर जळगाव हे गुरुवारी ५ डिसेंबर रोजी सकाळी ९ वाजता त्याचा मामाचा मुलगा दादाभाऊ शांताराम सुरंगे यांच्यासोबत जळगाव शहरातील जुम्मा वखार परिसरातून जात असताना समोरून येणाऱ्या दुचाकीने जोरदार धडक दिली. या धडकेत दिपक काळनोद हा गंभीर जखमी झाला. अपघाताचा जाब विचारण्यासाठी गेलेल्या जखमी दिपकला समोरील अज्ञात दुचाकीस्वाराने त्यांच्या नातेवाईकांसोबत येवून दिपकला शिवीगाळ करत चापटाबुक्क्यांनी बेदम मारहाण करून गंभीर दुखापत केली. दरम्यान या घटनेबाबत सायंकाळी ७ वाजता एमआयडीसी पोलीस ठाण्यात धाव घेऊन तक्रार दिली. त्यानुसार अज्ञात दुचाकीधारकावर गुन्हा दाखल करण्यात आला आहे. या घटनेबाबत पुढील तपास पोलीस उपनिरीक्षक सचिन नवल करीत आहे.
