जळगाव लाईव्ह ट्रेंडस न्यूज प्रतिनिधी । वडिल दरवाजा बंद करुन प्रचाराला गेल्याने घरात बंद असलेल्या मुलीने गॅलरीत साडी बांधून उतरण्याचा प्रयत्न केला, मात्र त्यात चौथ्या मजल्यावरुन पडल्याने १९ वर्षीय तरूणीचा जागीच मृत्यू झाल्याची घटना मंगळवारी २९ ऑक्टोबर रोजी दुपारी घडली. प्रेरणा विजय गजरे (वय १९ रा.मुंदडा नगर, जळगाव) असे मयत तरूणीचे नाव आहे.
नातेवाईकांनी दिलेल्या माहितीनुसार, रामानंद नगरातील शंभर फुटी रस्त्याला लागून असलेल्या मुंदडा नगरातील साई लक्ष अपार्टमेंटमध्ये विजय गजरे हे मुलगी प्रेरणा हिच्यासह काही दिवसापूर्वीच वास्तव्याला आले होते. ते मुळचे यावलचे असून माजी नगरसेवक आहेत. मंगळवारी २९ ऑक्टोबर रोजी दुपारी २ वाजता अमळनेर येथे कॉग्रेस उमेदवाराचा अर्ज दाखल करण्यासाठी गेले होते. प्रेरणा ही मतीमंद असल्याने घरातून कुठेही निघून जाते म्हणून बाहेर जाताना त्यांनी घराचा दरवाजा बाहेरुन बंद केला होता. प्रेरणा हिने दरवाजा ठोठावला मात्र उघडला नाही. गॅलरीतून साडी बांधून उतरण्याचा प्रयत्न केला असता त्यात ती कोसळली. डोक्याला जबर मार लागून रक्तस्त्राव झाला. शेजारील लोकांनी तिला शासकीय रुग्णालयात हलविले असता डॉक्टरांनी मृत घोषीत केले. घटना कळताच वडिलांनी धाव घेतली, मुलीचा मृतदेह पाहून त्यांनी हंबरडा फोडला. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली.
