धरणगाव-लाईव्ह ट्रेंडस न्यूज प्रतिनिधी । धरणगाव रेल्वे स्थानकाजवळून रेल्वेने प्रवास करत असतांना ७५ वर्षीय परप्रांतीय वृध्द महिलेचा तोल जावून धावत्या रेल्वेतून पडल्याने जागीच मृत्यू झाल्याची घटना बुधवारी ९ ऑक्टोबर रोजी दुपारी ३ वाजेच्या सुमारास घडली आहे. याप्रकरणी सायंकाळी ६ वाजता धरणगाव पोलीसात अकस्मात मृत्यूची नोंद करण्यात आली. कस्तूदेवी जेरूपाराम देवासी वय ७५ रा. मोकणी जि.जालौर राजस्थान असे मयत वृध्द महिलेचे नाव आहे.
याबाबत अधिक असे की, कस्तूदेवी देवासी ही महिला आपल्या नातेवाईकांसह रेल्वेतून प्रवास करत होत्या. बुधवारी ९ ऑक्टोबर रोजी दुपारी ३ वाजेच्या सुमारास त्यांची रेल्वे ही धरणगाव रेल्वेस्थानकाजवळून जात असतांना कस्तूदेवी ह्या बाथरूमसाठी जात असतांना रेल्वे डब्याच्या दरवाजाजवळ त्यांचा तोल गेल्याने त्या धावत्या रेल्वेतून खाली पडल्या. त्यात त्या गंभीर जखमी झाल्याने त्यांचा जागीच मृत्यू झाला. ही घटना घडल्यानंतर धरणगाव पोलीसांनी घटनास्थळी धाव घेतली. मृतदेहाचा पंचनामा करून धरणगाव ग्रामीण रूग्णालयात दाखल करण्यात आला. याप्रकरणी धरणगाव पोलीस ठाण्यात अकस्मात मृत्यूची नोंद करण्यात आली. पुढील तपास पोहेकॉ दिपक पाटील हे करीत आहे.
