पुणे-लाईव्ह ट्रेंडस न्यूज वृत्तसेवा | शहरात गंभीर स्वरुपाच्या अपघाताच्या घटना वाढत आहेत. हवेली तालुक्यातील अष्टापूर फाटा परिसरात भरधाव दुचाकीने समोरून येणाऱ्या दुचाकीला धडक दिल्याने झालेल्या अपघातात दोन दुचाकीस्वारांसह सहा वर्षांच्या मुलाचा मृत्यू झाल्याची घटना घडली. प्रवीण सुनील पाटोळे आणि राजवीर प्रवीण पाटोळे अशी मृत्युमुखी पडलेल्यांची नावे आहेत. याप्रकरणी दुचाकीस्वार यश शेखावत गंभीर जखमी झाला होता. त्याच्याविरुद्ध लोणीकंद पोलिसांनी गुन्हा दाखल केला होता. उपचारादरम्यान यश शेखावत याचा मृत्यू झाल्याची माहिती लोणीकंद पोलिसांनी दिली. याबाबत अक्षय पाटोळे यांनी फिर्याद दिली आहे.
पोलिसांनी दिलेल्या माहितीनुसार, दुचाकीस्वार प्रवीण आणि त्यांचा मुलगा राजवीर शुक्रवारी सायंकाळी सव्वासातच्या सुमारास घरी निघाले होते. यवत परिसरातील राहू गावाकडून अष्टापूरकडे भरधाव वेगाने दुचाकीस्वार यश शेखावत निघाला होता. दुचाकीस्वार शेखावतने समोरुन येणारे दुचाकीस्वार प्रवीण यांना धडक दिली. प्रवीण आणि त्यांचा मुलगा राजवीर गंभीर जखमी झाले. दुचाकीस्वार शेखावत गंभीर जखमी झाला. अपघाताची माहिती मिळताच ग्रामस्थ आणि पोलिसांनी घटनास्थळी धाव घेतली. तिघांना तातडीने रुग्णालयात दाखल केले. उपचारांपूर्वीच दुचाकीस्वार प्रवीण आणि त्यांचा मुलगा राजवीर यांचा मृत्यू झाला. अपघातात गंभीर जखमी झालेल्या शेखावतचा उपचारादरम्यान मृत्यू झाला. पोलीस उपनिरीक्षक निलेश घोरपडे तपास करत आहेत.
