बोदवड-लाईव्ह ट्रेंड्स न्यूज प्रतिनिधी । न्यायालयीन प्रक्रियेतून सामान्य नागरिकांना जलद, सुलभ आणि किफायतशीर न्याय मिळावा, या उद्देशाने आयोजित करण्यात येणारी राष्ट्रीय लोक अदालत ही आता केवळ पर्यायी व्यवस्था न राहता लोकांच्या विश्वासाची ‘जन अदालत’ ठरत असल्याचे चित्र बोदवड येथे पाहायला मिळाले. बोदवड येथील दिवाणी व फौजदारी न्यायालयात उत्साहात पार पडलेल्या राष्ट्रीय लोक अदालतीत तब्बल ५३७ प्रकरणांचा सामंजस्याने निपटारा करण्यात येऊन ₹१७ लाखांहून अधिक रकमेची वसुली झाली.
या राष्ट्रीय लोक अदालतीस पक्षकारांकडून उत्स्फूर्त प्रतिसाद लाभला. दिवाणी व फौजदारी स्वरूपाची प्रलंबित प्रकरणे तसेच दाखलपूर्व दावे परस्पर संमतीने मिटविण्यात आले. दीर्घकाळ चालणाऱ्या न्यायालयीन तारखांपासून सुटका मिळाल्याने अनेक नागरिकांनी समाधान व्यक्त केले. या उपक्रमामुळे न्यायालयावरील कामाचा ताण कमी होण्यासही मदत झाली.
तालुका वकील संघाचे अध्यक्ष ॲड. अर्जुन पाटील यांनी यावेळी लोक अदालतीचे महत्त्व अधोरेखित करताना सांगितले की, “लोक अदालत खऱ्या अर्थाने ‘जन अदालत’ ठरली आहे. वर्षानुवर्षे चालणाऱ्या वादांमुळे होणारा मानसिक त्रास, वेळ आणि पैशांची हानी टाळण्यासाठी लोक अदालत हा सर्वोत्तम मार्ग आहे.” लोक अदालतीने त्वरित न्याय दिला असून दुभंगलेली मने जोडण्याचे कार्य केले असल्याचे त्यांनी भावनिक शब्दांत स्पष्ट केले. “वाद मिटवा आणि आयुष्यात पुढे चला,” असे आवाहनही त्यांनी पक्षकारांना केले.
कार्यक्रमाचे उद्घाटन एपी खोल्लम यांच्या हस्ते पार पडले. यावेळी तालुका वकील संघाचे अध्यक्ष ॲड. अर्जुन पाटील यांची प्रमुख उपस्थिती होती. कार्यक्रमाचे सूत्रसंचालन ॲड. के. एस. इंगळे यांनी केले. सरकारी वकील दिलीप वळवी, ॲड. निलेश लढे, ॲड. धनगर, ॲड. मीनल अग्रवाल, ॲड. सोनाली सुरवाडे (जामनेर), ॲड. व्ही. पी. शर्मा, ॲड. किशोर महाजन, ॲड. धनराज प्रजापती यांच्यासह अनेक वकील बंधू-भगिनींनी सक्रिय सहभाग नोंदवत प्रकरणे तडजोडीत काढण्यासाठी महत्त्वाची भूमिका बजावली.
या लोक अदालतीस प्रशासकीय यंत्रणेकडूनही भक्कम पाठिंबा मिळाला. महसूल विभागातील अधिकारी, तलाठी व नायब तहसीलदार बी. डी. पाटील, तालुक्यातील सर्व ग्रामपंचायतींचे ग्रामसेवक, विस्तार अधिकारी, तसेच राष्ट्रीयकृत बँकांमधील प्रतिनिधी व वीज महामंडळाचे कर्मचारी मोठ्या संख्येने उपस्थित होते. त्यांच्या समन्वयामुळे वसुलीच्या प्रकरणांचा जलद निपटारा शक्य झाला.
कार्यक्रम यशस्वी होण्यासाठी न्यायालयीन अधीक्षक वैभव तरटे, प्रशांत कुमार बेदरकर, श्रीराम भट, एस. एस. खेडकर, एस. के. बेलदार, शिपाई वाय. ओ. वंजारी, राजू धुंडाळे व केस वॉच कर्मचाऱ्यांनी मोलाचे सहकार्य केले. एकूण ५३७ प्रकरणांचा निपटारा करत ₹१७,००,३५७ इतकी रक्कम वसूल होणे हे या लोक अदालतीचे ठळक यश ठरले.
एकूणच, बोदवड येथील राष्ट्रीय लोक अदालत ही तडजोड, समेट आणि त्वरित न्यायाचा प्रभावी नमुना ठरली असून सामान्य नागरिकांचा न्यायव्यवस्थेवरील विश्वास अधिक दृढ करणारी ठरली आहे.
