मुंबई – लाईव्ह ट्रेंड्स न्यूज वृत्तसेवा। मराठा आरक्षणाच्या मुद्द्यावर पुन्हा एकदा वातावरण तापले असून, आंदोलनाचे प्रमुख नेते मनोज जरांगे पाटील यांनी आझाद मैदानात 5000 मराठा आंदोलक बसणार असल्याची स्पष्ट घोषणा केली आहे. सरकारने आंदोलनासाठी फक्त एका दिवसाची परवानगी दिल्याने हे अपुरे असल्याचे मत त्यांनी मांडले असून, आरक्षण मिळेपर्यंत शांततापूर्ण आणि कायद्याच्या चौकटीत राहून आंदोलन सुरूच ठेवणार असल्याचा निर्धार व्यक्त केला आहे.
सरकारकडून मिळालेली केवळ एक दिवसाची आंदोलन परवानगी पुरेशी नसल्याचे सांगत मनोज जरांगे यांनी तीव्र नाराजी व्यक्त केली आहे. त्यांनी स्पष्ट केले की, “आम्ही कायद्याचे पालन करणार आहोत, मात्र आरक्षण मिळेपर्यंत आंदोलन थांबणार नाही. त्यामुळे सरकारने यासाठी परवानगी द्यावी.” आझाद मैदानावर 5000 लोकांचीच उपस्थिती राहणार असून, त्या ठिकाणीच आंदोलन होईल, अशी माहिती त्यांनी दिली. या घोषणेमुळे आगामी काळात मुंबईत मोठा राजकीय आणि सामाजिक दबाव निर्माण होण्याची शक्यता आहे.
आंदोलनाचे सात टप्प्यांत आयोजन करण्यात आले असल्याचे त्यांनी पुन्हा अधोरेखित केले. जर आंदोलकांना त्रास देण्याचा प्रयत्न झाला, तर उरलेले हजारो कार्यकर्ते देखील मुंबईत दाखल होतील, असा स्पष्ट इशारा त्यांनी सरकारला दिला. “मराठा माय माऊली महाराष्ट्र जाम करतील” असे उद्गार काढत जरांगेंनी आंदोलनाच्या संभाव्य तीव्रतेचा इशारा दिला. “मी काहीही झालं तरी मुंबई सोडणार नाही,” असा ठाम पवित्रा त्यांनी घेतला आहे.
मुख्यमंत्री देवेंद्र फडणवीस यांच्यावर टीका करताना जरांगेंनी, “सगळे मला वेडा म्हणतात, पण फडणवीस यांनाच माहिती आहे, मी काय रसायन आहे,” असे म्हणत त्यांच्यावर अप्रत्यक्ष टोला लगावला. फडणवीस यांना “आपल्या नादी लागू नये,” असा इशाराही दिला.
या आंदोलनाच्या पार्श्वभूमीवर मनोज जरांगे यांनी आपल्या सर्व समर्थकांना शांतता राखण्याचे आवाहन केले. त्यांनी बजावले की, “कोणीही कायद्याचे उल्लंघन करु नये. शांततेतच मुंबईत येणार आहोत. लोकशाहीचे पालन होणे अत्यंत आवश्यक आहे.” आंदोलकांनी सरकारच्या परवानगीनुसारच वागावे, असे आवाहन त्यांनी केले.
सरकारकडून फक्त 5000 लोकांनाच परवानगी मिळाल्याने आंदोलनकर्त्यांची संख्या मर्यादित असली, तरी या आंदोलनाचे लाटेप्रमाणे पडसाद उमटण्याची शक्यता वर्तवली जात आहे. जर सरकारने संवादाच्या दिशेने पावले उचलली नाहीत, तर हे आंदोलन अधिक तीव्र रूप धारण करेल, असा इशारा मनोज जरांगेंनी दिला आहे.
